Regstappe kom teen Lance
2013-01-15 09:01
Adelaide – Die regering van Suid-Australië het Dinsdag gesê hy gaan skadevergoeding van die omstrede fietsryer Lance Armstrong eis ná hy glo tydens ‘n onderhoud met Oprah Winfrey erken het dat hy opkikkers gebruik het.
Jay Weatherill, die premier van Suid-Australië, het gesê die staat gaan eis dat Armstrong die miljoene dollars terugbetaal wat aan hom betaal is om in 2009, 2010 en 2011 aan die Tour Down Under-fietstoer deel te neem.
Weatherill het gesê berigte dat Armstrong gebieg het, het die staat se siening oor sy vergoeding verander, omdat hy "die fietsrygemeenskap oor die wêreld bedrieg het".
“Ons sal meer as gelukkig wees as Armstrong ons terugbetaal,” het Weatherill gesê.
Hy het egter geweier om te sê hoeveel die staat hom betaal het om vir drie jaar aan die fietstoer deel te neem.
Die onderhoud met Winfrey sal later in die week op die Oprah Winfrey Network uitgesaai word.
Suid-Afrikaanse kykers sal die onderhoud op Vrydag, 18 Januarie op DStv se kanaal 172 en TopTV se kanaal 453 kan volg.
Die onderhoud sal ook regstreeks op Winfrey se webtuiste, oprah.com, gewys word.
Kykers kan Vrydagoggend om 04:00 na die onderhoud kyk op die webtuiste.
DStv sal die onderhoud Vrydagaand om 19:30 op kanaal 172 uitsaai.
Dit is egter nog nie bekend om watter tyd die onderhoud op TopTV te siene sal wees nie.
– Volg Nuus24 op Twitter
- Sapa - AP
