Regering steeds stil oor Caster se toekoms
2010-06-11 06:54
Die Burger
Pretoria. – Daar heers steeds verwarring oor die toekoms van die internasionale atleet Caster Semenya, Suid-Afrika se vroue-wêreldkampioen in die 800 m, nadat ’n mediakonferensie wat deur Makhenkesi Stofile, minister van sport, belê is gister inderhaas afgelas is.
Stofile sou glo aangekondig het dat Semenya toegelaat gaan word om as vrou deel te neem.
Twee uur voor die konferensie is die media skielik ingelig dat dit afgelas is. Van regeringskant is daar geen amptelike verduideliking daarvoor gegee nie.
Greg Nott, Semenya se regsverteenwoordiger, het gister gesê die mediese span wat deur die Internasionale Vereniging van Atletiekfederasies (IAAF) aangestel is om vas te stel of Semenya wel toegelaat mag word om as vrou deel te neem, het reeds sy ondersoek afgehandel.
“Ek dink die probleem is dat die mediese komitee nog nie sy bevindinge aan die uitvoerende bestuur van die IAAF bekend gemaak het nie, wat beteken dat dit nog nie deur die IAAF bespreek is nie.
“Dit is waarskynlik die rede waarom die minister die konferensie moes aflas.”
Stofile het nou reeds twee keer die afgelope drie weke uitlatings gemaak wat daarop neerkom dat Semenya beslis weer aan internasionale atletiek gaan deelneem.
Die vraag wat gister in plaaslike atletiekkringe gevra is, is waarom Stofile so oorgretig was om ’n aankondiging oor Semenya se toekoms te maak sonder dat hy die IAAF daarin geken het, en dit nogal ’n dag voor die Wêreldbeker-sokkertoernooi begin.
Die minister se optrede is as suiwer opportunisme afgemaak.
Nick Davies, woordvoerder van die IAAF, het vir die tweede keer in drie weke benadruk dat die ondersoek na Caster nog nie afgehandel is nie.
Volg Nuus24 op Twitter
- Die Burger