Red Bull kritiseer Vettel se straf

2012-07-24 16:25

Wene – Red Bull het die Internasionale motorsportfederasie (FIA) se besluit om Sebastian Vettel vir ‘n onwettige verbysteek te penaliseer, gekritiseer.

Die verdedigende Formule Een-kampioen is met 20 sekondes gepenaliseer ná hy tydens Sondag se Duitse Grand Prix vir Jenson Button op die laaste rondte onwettig verbygesteek het.

Vettel het gevolglik na die vyfde plek teruggesak met Button wat die Duitser se tweede plek ingeneem het.

Volgens Helmut Marko, Red Bull se span-adviseur, was Vettel se verbysteek heeltemal “normaal.”

“Daar was nie enige voordele vir Vettel nie. Ons glo wat hy gedoen het was reg.”

Marko het ook uitgewys dat ‘n soortgelyke beweging deur Lewis Hamilton by die Bahrain Grand Prix nie enige straf ontvang het nie.

Jean-Eric Vergne, renjaer vir Toro Rosso, het ook sy ondersteuning vir Vettel gegee, “Jenson moes vir Vettel meer spasie gegee het. Ek sou dieselfde reageer het as ek Sebastian was.”

Vettel is op die oomblik derde op die jaers se puntelys, 44 punte agter die voorloper Fernando Alonso van Ferrari. Vettel se Red Bull-spanmaat Mark Webber is tweede.

– Volg Nuus24Sport op Twitter

- AFP