Rassisme 'nie net 'n sokkerprobleem'

2012-12-15 14:22

Tokio – Sepp Blatter, president van die sokkerbeheerliggaam Fifa, glo dis onmoontlik om rassisme in sokker uit te roei terwyl dit steeds 'n probleem in die breër samelewing bly.

Blatter het Saterdag gesê hy sal met die Uefa-baas Michel Platini praat oor die boete wat Serwië opgelê is vir insidente by 'n onder-21-wedstryd teen Engeland in Oktober.

"Ek sal 'n gesprek voer met die president van Uefa," het Blatter aan verslaggewers gesê ná 'n vergadering van Fifa se uitvoerende komitee in Tokio.

Uefa het gesê Serwië kan teen die boete van $105 000 (sowat R900 000) wat hy opgelê is, appèl aanteken.

"Ek weet nie of hy 'n inloed op sy tugkomitee het nie," het Blatter bygevoeg.

"Fifa se standpunt is definitief een van geen genade vir diskriminasie en rassisme nie.

"Ons moet baie, baie sterk staan teen diskriminasie en rassisme in sokker," het hy bygevoeg.

"Rassisme en diskriminasie bestaan in sokker. Maar dit kom nie van sokker nie, dit kom van ons samelewing. Dis 'n vraag van solidariteit en opvoeding."

– Volg Nuus24Sport op Twitter.

- Reuters