Proteas 'nie bang vir vir Kiwi's'
2011-07-08 07:40
Kaapstad – Die Suid-Afrikaanse netbalspan kom Vrydag in Singapoer in die kwarteindronde van die Wêreldbeker-toernooi te staan teen ’n span wat hom verlede jaar met meer as 40 doele geklop het.
Maar Suid-Afrika se hoofafrigter, Elize Kotzé, het gesê haar spelers benader dié stryd nie met minderwaardigheid nie.
Die Proteas moet Nieu-Seeland, die voorste span in die wêreld, klop om tot die halfeindronde deur te dring en hul droom om tussen die top4-spanne te eindig, te bewaarheid.
Die Silwervarings staan egter breed in hul pad ná die groepfase waarin die Nieu-Seelanders 246 doele aangeteken en net 69 afgestaan het.
Dit is in teenstelling met Suid-Afrika se algehele telling van 172-143.
Boonop het die Kiwi’s Suid-Afrika verlede jaar op die Statebondspele met 70-29 geklop.
“Ons weet dit gaan ’n taai wedstryd wees, maar ons benadering is dieselfde as voor die kragmeting met Jamaika (hul eerste wedstryd in die groepfase),” het Kotzé gesê. Sy was in 1995 deel van die span wat Nieu-Seeland geklop en tweede in die Wêreldbeker-toernooi geëindig het.
“Ons gaan die wedstryd met selfvertroue binne, nie as ’n minderwaardige span nie. Die Proteas het vanjaar van daardie mentaliteit ontslae geraak.”
Die Proteas-onderkaptein, Zanele Mdodana, het gesê haar span is ’n gans ander een as die een wat verlede jaar deur Nieu-Seeland verneder is.
“Ons het sedertdien baie verbeter en is ’n ander span.
“Wat belangrik is, is dat ons volgens ons eie styl speel en dit so goed moontlik doen, eerder as om by hulle te probeer aanpas. Nieu-Seeland is die beste ter wêreld en ons sal op ons heel beste moet wees om hulle te klop.”
Die Suid-Afrikaners het vandeesweek gemengde welslae behaal, met ’n nederlaag teen Jamaika (nr. 4 in wêreld) in hul eerste wedstryd Maandag, en goeie oorwinnings daarna oor Singapoer en Botswana.
Wat in dié drie wedstryde duidelik geword het, is dat die Proteas al die vaardighede en selfvertroue het wanneer hulle teen die sogenaamde kleiner spanne te staan kom, maar dat hulle teen die grotes onder druk vou. Kotzé het gesê die span sal nie werklik sukses behaal voordat dít nie verander nie.
“Al wat hierdie span kort, is ondervinding. Die enigste manier waarop ’n span se prestasievlakke kan verbeter, is as hy gereeld teen die heel bestes getoets word. Dis al hoe jy werklik van jou tekortkominge bewus word en leer om die druk te verwerk.”
* Die kwarteindstryd word om 09:25 regstreeks op SS 5 uitgesaai. Die wenner se waarskynlike halfeind-teenstander sal Engeland wees; en die verloorder sal dan Saterdag teen Noord-Ierland speel.
Vir die jongste sportnuus volg Nuus24Sport op Twitter.
– Sport24