Proteas-kaptein wil netbal in NS slyp
2012-02-03 10:02
Bloemfontein – Die Proteas-kaptein, Amanda Mynhardt, vertrek einde Februarie na Nieu-Seeland waar sy klubnetbal in Auckland gaan speel.
Sy het dit pertinent gestel dat sy nie vir Suid-Afrika verlore is nie en dat sy enige tyd vir die nasionale span, soos ooreengekom, beskikbaar sal wees.
Die 26-jarige verdediger/hulpverdediger sê haar hoofdoel met die Kiwi-uitstappie is bloot om ervaring te gaan opdoen – iets wat sy later by die Proteas sal kan terugploeg.
“Ons speel eintlik baie min netbal hier en my groot doel is om bykomende ervaring te gaan opdoen.”
Die voormalige Silver Ferns-breier Yvonne Willering was by die reël daarvan betrokke. Alle betrokkenes is ook bewus van die voorwaarde dat Suid-Afrika steeds eerste keuse op haar het.
Netbal Suid-Afrika beplan ’n driehoekige reeks, terwyl Jamaika die Proteas ook vir ’n toetsreeks uitgenooi het.
“Ons het nog geen kalender gekry nie, maar hulle weet ek is beskikbaar, wat een van die voorwaardes was,” sê Mynhardt.
Behalwe dat sy kleintyd daarvan gedroom het om eendag vir Suid-Afrika te speel, was dit ook nog altyd ’n droom van haar om beroepsnetbal te speel, sê Mynhardt.
Die Blues sal vanjaar sonder haar moet klaarkom indien die Netball Grand Series nog voortgaan.
Mynhardt hoop om ook later provinsiale netbal in Nieu-Seeland te speel.
)Die bekende dr. Sherylle Calder, wat verskeie sportspanne, onder meer die Springbokke, as spesialis in visuele vaardighede bygestaan het, gaan die nasionale netbalspan ook touwys maak.
Calder meen die spelers behoort nadat sy hulle onder hande gehad het vinniger en meer doeltreffende besluite onder druk te kan neem.
Die voormalige Proteas-breier Elize Kotzé het die nuus verwelkom en sê dit kan hulle na daardie volgende vlak neem.
“As ons tussen die voorste vier spanne ter wêreld wil tel, moet daar iewers vordering gemaak word. Ons moet ook meer spesifiek wees oor wat ons probeer doen.
“Die soort afrigting wat dr. Calder sal voorsien, kan ons na die volgende vlak neem.
“Ons het fantastiese spelers en met dié wetenskaplike hulp twyfel ek nie dat ons by ons doelwit, om met die voorste vier spanne saam te praat, sal uitkom nie.”
Vir die jongste sportnuus volg Nuus24Sport op Twitter.
– Sport24