Protea-deelname aan Afrika Spele in wiele gery
2011-08-12 08:39
Belville – Die Suid-Afrikaanse netbalspan sal nie in September aan die Afrika Spele in Mosambiek deelneem nie.
Die president van Netbal Suid-Afrika, Mimi Mthethwa, het Donderdag gesê daar is nie genoeg geld om ’n volsterkte span na Maputo te stuur nie.
Die Spele sal van 3 tot 18 September plaasvind.
“Ons het met die senior spelers gepraat en besluit om nie ’n span te stuur nie,” het Mthethwa gesê.
“Die spelers kan eenvoudig nie bekostig om nóg onbetaalde verlof te neem nie.
“Die spelers het ook sterk daaroor gevoel dat ons nie ’n B-span na die Spele moet stuur nie.”
Volgens Mthethwa is daar wêreldranglys-punte op die spel en as Suid-Afrika nou wedstryde gaan verloor, sal sy vyfde plek op die wêreldranglys in die gedrang wees.
“Daar is ’n sterk gevoel dat ons nie die goeie werk van die Wêreldbeker-toernooi ongedaan moet maak nie,” het die president gesê.
Volgens Mthethwa is die onttrekking aan die Spele net ’n bewys van hoe dringend NSA geld van die nasionale regering benodig.
“In Australië, Engeland, Nieu-Seeland en sover ek weet Jamaika kry die netbalspanne staatshulp.
“Ons het dit nodig, baie nodig.”
Die jongste rakende Sentraal-Gauteng se onttrekking aan die nasionale toernooi dié week hier in die Bellville-velodrome is dat Mthethwa steeds geen amptelike rede of verskoning van Sentraal-Gauteng se president, Prof Chipeya, gekry het nie.
“Prof sê nou hy het ’n boodskap aan NSA gestuur, maar aan wie by NSA? Dit is die nasionale toernooi, dus moet die amptelike korrespondensie aan my as president of aan Bennie Saayman, wat verantwoordelik vir die toernooi is, gerig wees.
“Ons sal bymekaar moet kom en hieroor praat. Ek gaan nie reageer op bespiegelings nie. Ek verstaan ook glad nie waarom ek nog niks van Prof gehoor het nie, want ons is gewoonlik baie oop en eerlik met mekaar.”
Vir die jongste sportnuus volg Nuus24Sport op Twitter.
– Sport24