Prokureurs: Caster nie gediskwalifiseer
2010-01-18 11:27
Johannesburg – Die atleet Caster Semenya is nié gediskwalifiseer van toekomstige atletiekbyeenkomste nie, het die regsfirma wat haar verteenwoordig Maandag gesê.
"Haar medalje en prysgeld is bevestig en die rekord staan nog. Sy is nie van toekomstige byeenkomste gediskwalifiseer nie,” het Gregory Nott en Jeffrey Kessler van die regsfirma Dewey en LeBoeuf gesê.
Die firma is besig met pogings om 'n ooreenkoms met die Internasionale Vereniging van Atletiekfederasies (IAAF) te bereik aangaande haar individuele regte asook haar regte as internasionale atleet.
Semenya is sedert verlede jaar in die nuus nadat haar sukses by 'n internasionale byeenkoms in Duitsland vrae oor haar geslag laat ontstaan het.
Dewey en LeBoeuf wou as gevolg van die sensitiwiteit van die saak nie vroeër daaroor kommentaar lewer nie.
"Tog is dit duidelik dat daar weer op ons kliënt se regte inbraak gemaak is. Caster is 'n wêreldkampioen. Sy het niks verkeerd gedoen nie,” het die firma gesê.
Die firma sê hulle het vertroue in die onderhandelingsproses, maar totdat die saak nie afgehandel is nie, verwag hulle dat haar regte deur alle atletiek organisasies, plaaslik en internasionaal, gerespekteer moet word.
Semenya se afrigter, Michael Seme, het verlede week aangekondig dat sy weer aan byeenkomste, en spesifiek die Geelbladsye-reeks, sal deelneem.
Atletiek Suid-Afrika (ASA) en die Suid-Afrikaanse Sportkonfederasie en Olimpiese Komitee (Saskok) het egter gesê sy kan nie deelneem tot die IAAF nie die resultate van haar geslagstoetse bekend gemaak het nie.
–Sapa