Pistorius looi 46 s ... wéér
2011-09-20 07:05
Pretoria – Oscar Pistorius het Sondagaand in Milaan, Italië, met sy sege in die 400 m bewys hy kan Suid-Afrika aanstaande jaar op die Olimpiese Spele in Londen verteenwoordig.
Pistorius se wentyd was 45.97 sekondes.
“Oscar is nou amptelik lid van die 45 sekonde-klub in die 400 m,” het Ampie Louw, sy afrigter, gejubel.
Die rede waarom Louw so opgewonde oor Pistorius se tyd is, is omdat dit die tweede keer in drie dae was dat hy die 400 m vinniger as 46 sekondes afgenael het.
Vrydagaand in Brussel, op die tweede van die Diamantliga se eindronde-byeenkomste, was Pistorius derde in 45.46.
Dit is die derde vinnigste tyd van sy loopbaan.
Pistorius het tot dusver vanjaar ses keer tye van vinniger as 46 sekondes gehardloop, maar kon dit nog nooit ná mekaar in so ’n kort tydperk vermag nie.
Sy beste tyd – 45.07 – is vanjaar net deur 19 atlete oortref.
As Pistorius dieselfde tyd op die Wêreldbyeenkoms in Daegu, Suid-Korea, gehardloop het, was die kans goed dat hy vyfde in die eindronde kon eindig.
Volgens Louw het Pistorius bewys dit is nie meer vir hom ’n probleem om tye onder 46 s te hardloop nie.
“Daarom is die volgende groot uitdaging om seker te maak dat hy aanstaande jaar op die Olimpiese Spele in Londen vir drie dae konstant tye vinniger as 46?s opstel,” het Louw gesê.
Op die Wêreldbyeenkoms was sy tyd in sy uitdun 45.39 en in die halfeindronde was dit 46.19.
Die wêreldkampioen van Grenada, Kirani James, se tye in die drie wedlope op die Wêreldbyeenkoms was onderskeidelik 45.12, 45.20 en 44.60.
Volgens Louw was die wedloop in Milaan nie maklik nie.
“Die baan was sopnat en dit was winderig, maar Oscar het hom nie daardeur laat ontsenu nie.”
Pistorius neem vanaand in Warschou, Pole, deel.
“Oscar is regtig moeg op die oomblik, maar ek het al gesien dat hy die vermoë het om sy beste vir laaste te hou. Wie weet, dalk gaan hy weer ’n tyd van vinniger as 46 s hardloop,” het Louw gesê.
“As Oscar dít regkry, moet niemand weer met die verskoning vorendag kom dat hy nie goed genoeg is om op ’n Wêreldbyeenkoms of Olimpiese Spele aan die uitdunne en die eindronde van die 4x400-aflos deel te neem nie.”
Die VSA se atletiekspan het Sondag in Nice, Frankryk, die DecaNation-spanbyeenkoms gewen.
Rusland het tweede geëindig en Duitsland derde.
Suid-Afrika was sewende. Luvo Manyonga, wat tweede in die verspring met ’n sprong van 7.99 m was, en Lehann Fourie, wat derde in die 110-hekkies was met ’n tyd van 13.71 s, was Suid-Afrika se beste atlete.
– Sport24
– Bly op hoogte van al die jongste sportnuus deur Nuus24Sport op Twitter te volg