Pep: 'Contador moet veg teen skorsing'
2012-02-08 22:12
Madrid – Die Barcelona-afrigter, Pep Guardiola, wat as speler in Italië 'n opkikker-saak teen hom gewen het, het Alberto Contador aangemoedig om "tot die einde van die wêreld" teen sy skorsing te veg.
"In hierdie situasies, en ek praat van ervaring, is daar slegs een persoon wat weet wat gebeur het en dit is hy," het Guardiola Woensdag aan die Spaanse media gesê.
"En as hy weet dat hy regtig onskuldig is soos wat hy in die openbaar en in die privaat gesê het, moet hy homself verdedig tot die einde van die wêreld vir so lank as wat dit vat."
Guardiola het by 'n perskonferensie op die vooraand van Barcelona se wedstryd teen Valencia gepraat.
Die afrigter is in 2001 vir vier maande geskors nadat hy positief getoets het vir die verbode middel nandroloon. Hy het teen die skorsing appelleer en is in Oktober 2007 deur 'n kriminele hof vrygespreek.
Die arbitrasiehof vir sport (CAS) het Contador Maandag vir twee jaar geskors, omdat hy gedurende die 21ste skof van 2010 se Tour de France clenbuterol gebruik het.
Contador het Dinsdag gesê sy regspan bespreek tans 'n moontlike aansoek om appèl, wat binne 30 dae ingehandig moet word.
Die Spanjaard voer aan dat hy die slagoffer van besmette vleis is, wat hy tydens die 2010 Tour de France geëet het.
Vir die jongste sportnuus volg Nuus24Sport op Twitter.
- Sapa - AFP