Paralimpiese atleet geskors
2011-04-06 23:00
Johannesburg - Die Suid-Afrikaanse paralimpiese atleet Fanie Lombaard is vir een jaar geskors nadat hy positief getoets het vir ‘n verbode middel, het die Suid-Afrikaanse Sportkonfederasie en Olimpiese Komitee (Saskok) Woensdag bevestig.
Lombaard (41) het in Januarie by die IPK Atletiek-wêreldkampioenskappe in Christchurch, Nieu-Seeland, die goue medalje in die F42-kategorie van die diskuskompetisie gewen.
Hy is ná die tyd positief getoets vir die middel Probenecid.
Die IPK se komitee teen opkikkers het dit nie as gepas beskou om Lombaard die maksimum moontlike straf van twee jaar op te lê nie. Hulle het besluit “die respondent sal krediet ontvang vir die tydige erkenning van sy oortreding”.
Die paneel het opgemerk dat Lombaard “bewyse getoon het wat wys dat hy aan ‘n siekte (jig) ly, waarvoor, onder meer, Probenecid voorgeskryf word”.
Lombaard, ‘n sewemalige paralimpiese medaljewenner, sal tot 26 Januarie 2012 nie aan byeenkomste mag deelneem nie.
- Vir die jongste sportnuus, volg Nuus24Sport op Twitter
- SAPA