Pa: Caster ís 'n vrou
2009-08-20 11:47
Johannesburg – Caster Semenya se gesin sê sy is definitief ‘n vrou ten spyte van vrae oor haar geslag wat wêreldwyd opspraak maak.
“Die kontroversie pla my nie so baie nie want ek weet sy is ‘n vrou. Ek het haar self grootgemaak,” het Semenya se ouma, Maputhi Sekgala, aan The Times gesê.
Semenya het Woensdag die 800m by die Wêreldkampioenskappe in Berlyn gewen.
Sy is in omstredenheid gehul toe media oor die wêreld haar manlike gelaatstrekke onder die soeklig geplaas en haar geslag betwyfel het.
Die internasionale atletiekbeheerliggaam, IAAF, ondersoek dié bewerings.
“Wat kan ek doen as hulle haar ‘n man noem en sy is nie regtig ‘n man nie? God het haar so gemaak,” het Sekgala gesê.
Semenya se beste vriendin, Deborah Morong, het ook die atleet se geslag verdedig.
Haar pa, Jacob Semenya, het gepleit dat sy dogter uitgelos word.
“Sy is my meisiekind. Ek het haar grootgemaak en het nog nooit haar geslag betwyfel nie. Sy is ‘n vrou en dit kan ek ‘n miljoen keer herhaal,” het hy aan die Sowetan gesê.
Sekgala het gesê haar kleindogter word by die skool ook geterg oor haar voorkoms en omdat sy die enigste meisie in die plaaslike sokkerspan is.
– Sapa