Oud-renjaer wen goud by Paralimpiese Spele

2012-09-06 10:56

Londen – Die voormalige Formule Een-renjaer Alessandro Zanardi, het weer op 'n renbaan gewen toe hy Woensdag goud in die individuele tydtoets van die handfiets-item (H4-kategorie) by die Paralimpiese Spele gewen het.

Die 45-jarige Italianer se tyd van 24 minute en 50.22 sekondes oor 'n afstand van 16 km, was 27 sekondes vinniger as die silwermedalje-wenner Norbert Mosandl van Duitsland. Die Amerikaner Oscar Sanchez het brons gewen.

Zanardi, 'n oud-renjaer vir Minardi en Lotus, is in 2001 in 'n ernstige motorongeluk beseer en moes albei sy bene laat amputeer.

Hy het teruggeveg om weer aan sport deel te neem en het selfs in 'n wedren by die Brands Hatch-renbaan in Engeland, dieselfde renbaan waar hy sy goue medalje gewen het, gejaag in 'n motor wat spesiaal aangepas is met handkontroles.

Lees die volledige artikel hier.

Vir die jongste sportnuus volg Nuus24Sport op Twitter.

- Sapa - AP