Oscar 'het vrede met kritici'
2011-09-09 07:05
Londen. – Oscar Pistorius gaan hom nie steur aan kritici nie in sy aanslag om vir aanstaande jaar se Olimpiese Spele in Londen te kwalifiseer.
“Ek is heeltemal gemaklik met wie ek is en wat ek reeds as atleet bereik het,” het die Paralimpiese ster van Suid-Afrika gesê.
“Daarom het ek vrede met wat my kritici sê of doen. Ek het reeds genoeg gedoen om te bewys dat die kunsbene waarmee ek hardloop my nie ’n onregverdige voordeel gee nie.
“Ek gaan beslis nie in die volgende 10 maande in die opbou na die Spele aanhoudend my deelname aan nie-gestremde atletiekbyeenkomste bly verdedig nie.
“Ek is ’n beroepsatleet en my werk is om te oefen en opofferinge te maak om my doelwitte te verwesenlik.”
Pistorius het op die afgelope Wêreldbyeenkoms in Daegu, Suid-Korea, verras toe hy vir die 400-halfeindronde gekwalifiseer het.
Sy tyd van 45.39 sekondes is die naasbeste van sy loopbaan. Hy het vir dié byeenkoms met ’n tyd van 45.07 gekwalifiseer.
Wat Suid-Afrikaanse atletiek betref, kon nog net LJ van Zyl (44.86) vanjaar vinniger tye as Pistorius in die 400 m opstel.
Pistorius het gesê sy grootste uitdaging is om voortaan konstant goeie tye te hardloop.
“Enige atleet wat op die Olimpiese Spele of op die Wêreldbyeenkoms wil presteer, moet daartoe in staat wees om binne vier dae drie keer tye baie na aan 45?sekondes te hardloop.
“Ek sukkel nog om dit te reg te kry.”
Pistorius was ook lid van die Suid-Afrikaanse 4x400-aflosspan wat die Suid-Afrikaanse rekord verbeter het en ’n silwermedalje verower het.
Dit is vir hom ’n teer punt dat hy weggelaat is uit die span wat aan die aflos-eindronde deelgeneem het.
“Dit voel nie vir my asof ek regtig die medalje verdien nie. Op ’n manier is dit ’n goeie ding, want ek is nou nog meer gemotiveerd as ooit vantevore om te bewys ek verdien my plek in die Suid-Afrikaanse aflosspan.
“Een van die groot uitdagings is om die besluitnemers van die Internasionale Vereniging van Atletiekfederasies te oortuig dat ek geen gevaar vir ander atlete of myself inhou, sou ek een van die ander bene van die aflos hardloop nie.
“Daar is geen rede waarom ek net mag wegspring nie.”
– Bly op hoogte van al die jongste sportnuus deur Nuus24Sport op Twitter te volg
- Sapa - AP