Oscar bly op wenpad in 400 meter
2011-09-22 09:07
Pretoria – Oscar Pistorius het Dinsdag in Warskou in Pole die tweede keer in drie dae ’n internasionale 400 m-wedloop gewen.
Sy wentyd was 46.50 s. Maandag in Milaan in Italië was dit 45.97.
Ampie Louw, sy afrigter, gee toe dat die wentyd in Warskou nie “aardskuddend” was nie, maar voeg by dat dit ’n lang seisoen vir Pistorius was en dat hy moeg is.
“Wat my betref, is ’n wen ’n wen. Wanneer enige atleet wen, het hy ’n goeie wedloop gehardloop.
“Dit is belangrik dat Oscar nou ’n slag goed rus en heeltemal van atletiek vergeet voordat ons in alle erns vir die Olimpiese Spele in Londen begin voorberei.”
Louw sê dit gaan nie vir Pistorius moeilik wees om op die Olimpiese Spele én die Paralimpiese Spele te presteer nie.
“Ek gaan vir Oscar ’n program uitwerk wat hom in staat sal stel om op die Spele ten minste tot die halfeindronde van die 400 deur te dring en aan die uitdunne en eindronde van die 4x400-aflos deel te neem.
“In die twee weke tussen die twee Spele sal ons sy program effens aanpas.”
Pistorius het op die 2004- en 2008- Paralimpiese Spele goue medaljes in die 100, 200 en 400 gewen.
Die groot vraag is of hy dit weer kan regkry.
Vroeër vanjaar, op die Wêreldbyeenkoms vir gestremde atlete in Nieu-Seeland, het Jerome Singleton van die VSA Pistorius met millimeters in die eindronde van die 100 m (T44) geklop.
Die Amerikaner het seker gemaak hy wen deur sowat ’n meter van die eindstreep af vorentoe te duik en sy lyf voor Pistorius oor die eindstreep te kry. Pistorius en Singleton se tye was albei 11.34 s.
Louw twyfel nie dat Pistorius die 100 op die Paralimpiese Spele kan wen nie.
“Singleton sal regtig met ’n grootse poging vorendag moet kom as hy Oscar weer wil klop.”
Vir die jongste sportnuus volg Nuus24Sport op Twitter.
– Sport24