Oscar: ‘Dis verligting én bonus’
2011-08-29 10:00
Daegu, Suid-Korea – Oscar Pistorius, ’n Paralimpiese kampioen, het Sondag verseker sy sportsprokie duur voort toe hy hier op die Wêreld-atletiekbyeenkoms tot die tweede ronde van die 400 m deurgedring het.
Briljant is die enigste manier om die Suid-Afrikaner se vertoning oor daardie laaste 120 m te beskryf.
Toe dit saak maak, was hy in ’n kwaai tweestryd met Femi Ogunode van Katar om die derde plek gewikkel. Dit was ’n geval van dan is dié een voor, dan dié ander. Op geen stadium was die voorsprong tussen die twee atlete meer as enkele sentimeters nie.
Oor daardie laaste 40 m het Pistorius iewers krag vandaan gekry om weer te versnel. Daarmee het hy verseker hy eindig enkele sentimeters voor Ogunode.
Chris Brown van die Bahamas het in 45.29 s gewen. Martyn Rooney van Brittanje was tweede in 45.30 en Pistorius derde in 45.39.
Dit is Pistorius se naasvinnigste tyd tot nog toe. Verlede maand in Italië het hy vir die Wêreldbyeenkoms gekwalifiseer met ’n tyd van 45.07.
Pistorius het die wedloop as ’n besliste hoogtepunt beskryf.
“Dit is ’n groot verligting om my eerste wedloop op die Wêreldbyeenkoms agter die rug te kry. Om die tweede vinnigste tyd van my loopbaan te kon hardloop, is ’n absolute bonus.”
Pistorius vertel dat hy voor die wedloop sy huiswerk deeglik gedoen het.
“Voor elke wedloop lees ek op waartoe my teenstanders in staat is. Dit help my om te beplan.
“Ek het Tony Mcquay van die VSA gekies as die atleet om gedurende die wedloop dop te hou en my passkatting van te doen.”
Pistorius het gesê hy verkeer onder geen illusies wat in vandag se halfeindronde op hom wag nie.
“Dit gaan taai wees. Daarom wil ek geen voorspellings waag oor wat dalk kan gebeur nie. Elke atleet wat deelneem, het baie opgeoffer en is in Daegu om sy bes te lewer.
“Al wat vir my belangrik is, is om konstant goeie tye te kan hardloop. As ek dit in die halfeindronde kan regkry, sal ek baie tevrede wees.”
Toe Pistorius gevra is of sy vertonings in nie-gestremde atletiek vir hom meer spesiaal is as sy vertonings op die Paralimpiese Spele was sy antwoord dat dit glad nie die geval is nie.
“Die Paralimpiese Spele sal altyd baie spesiaal vir my wees en ek is trots om deel daarvan te kan wees. Wat ek nou regkry, is glad nie so spesiaal nie. Daar is baie ander gestremde atlete wat daagliks voluit lewe en weier om hul gebrek as ’n verskoning voor te hou.”
LaShawn Merritt van die VSA wie se wentyd van 44.35 in gister se uitdunne die vinnigste sover is, was vol lof vir Pistorius.
“Ek het ’n bietjie met hom gesels en hom as baie aangenaam ervaar. Ek bewonder sy durf. Ek het die idee gekry die woord opgee bestaan nie in sy woordeskat nie.”
Toe Meritt deur ’n Amerikaanse joernalis gepols is oor hy voel om teen ’n atleet met kunsbene deel te neem, was sy antwoord dat hy geen probleem daarmee het nie.
“Pistorius het bewys hy is goed genoeg om tot die halfeindronde deur te dring en ek aanvaar dit.”
Vir die jongste sportnuus volg Nuus24Sport op Twitter.
– Sport24