Oostenryker slaan eerste slag
2010-03-10 08:02
Eunice Visagie
Wellington - Alles het Dinsdag hier volgens plan verloop vir die gunstelinge in die eerste skof van die Giro del Capo-fietstoer en nou is die tafel gedek om op Vissershok die kaf van die koring te skei.
Rene Haselbacher (Safindi.co.za) het die eerste skof oor 106 km in 2 uur, 30 minute en 40 sekondes gewen. Dié Oostenryker is die algehele voorloper in dié vierdaagse fietstoer, wat Vrydag eindig.
Malcolm Lange (Medscheme) en Burry Stander (Specialized) was onderskeidelik tweede en derde. Lange is 1 sekonde agter Haselbacher en Stander 6.
Gunstelinge soos Kevin Evans (MTN-Energade), David George (Safindi.co.za) en Hanco Kachelhoffer (Medscheme) is almal 10 sekondes agter.
Volgens Lange was dit een van die makliker skofte waaraan hy in die Giro deelgeneem het. Die weer was koel ná die hittegolf wat die Boland die laaste ruk geteister het.
Die pad was ook nat ná ’n donderbui vroegoggend. Daar was ’n val of twee, met Shaun-Nick Bester (Specialized) die dag se vernaamste slagoffer.
Hy het nie net van sy tande op die teer verloor nie, maar is onttrek nadat sy fiets gebreek het.
Die wind het ’n rol gespeel en die bondel het opgebreek.
Kort voor Wolseley, toe die bondel regs in die rigting van dié dorp moes draai, het Medscheme met behulp van ’n sterk dwarswind die bondel opgebreek.
Die bondel was dié beweging te wagte, maar nie almal kon reageer nie en ’n groep van ongeveer 20 jaers het weggekom.
Volgens Lange wou hy baie graag dié skof wen.
“Ek het oor die laaste meter van die naelrit ’n kramp gekry.”
Lange is die voorloper in die punte-afdeling en Waylon Woolcock (Medscheme) die bobaas van die berge.
Vandag se skof oor 143 km begin om 09:00 in Durbanville.
Die jaers sal die berugte Vissershok drie keer uitklim en dit is hier waar die ware aanspraakmakers na vore sal tree.
- Die Burger