Olimpiese atleet geskok oor weglating
2010-08-27 09:00
Pretoria - Die Olimpiese atleet René Kalmer sê sy wens sy het vroeër reeds geweet sy gaan nie volgende maand aan die Statebondspele in Indië deelneem nie, want dan sy sou verseker ’n uitnodiging aanvaar het om in die New York-marathon te hardloop.
Dit is nou te laat om behoorlik vir die New York-wedloop op 7 November voor te berei.
Daarom gaan die 30-jarige Kalmer Saterdag in Centurion aan die Spar-wedloop vir vroue oor 10 km deelneem en die volgende oggend aan die Spar-wedloop in Durban.
Kalmer, wat die afgelope paar maande wyd oorsee gereis en aan baanwedlope deelgeneem het, het gistermiddag toegegee haar weglating uit die Statebondspele-span kan haar besluit om haar voortaan op die marathon toe te spits, verhaas.
“Ek wil nou eers net my kop skoonkry en die skok (oor die weglating) agter die rug kry voordat ek begin planne maak vir ’n moontlike marathon,” het Kalmer gesê wat in 2001 in Edmonton, Kanada, die eerste keer aan die Wêreldbyeenkoms deelgeneem het. Sy het sedertdien tientalle SA baan- en veldlooptitels verower en dit sal waarskynlik sinvol wees as sy nou na die marathon oorskakel.
Danksy baan- en veldloopatletiek het sy nou spieruithouvermoë en die vaart om haar ’n goeie marathonatleet te maak.
“Ja, ek het seker nou genoeg ‘gemeenskapsjare’ op die baan en in veldloop gedoen,” het Kalmer gelag.
Sy sal een van sowat 20 000 vroue wees wat môremiddag aan die Spar-wedloop by SuperSportpark in Centurion deelneem. “Sondag is dit Durban (Kingsmead) en ek besluit gaan ook nou op 10 Oktober aan die Johannesburgse Spar-wedloop deelneem,” het Kalmer gesê.
Sy het Pretoriase wedloop twee keer die afgelope drie jaar gewen en is tans met 50 punte die voorloper in die Spar Grand Prix-reeks.
Sy hoop om die naweek nóg waardevolle punte te verdien met goeie vertonings en só ná die reeks met ’n tjek van R60 000 weg te stap.
Die junior Nandipha Dywili het net vyf punte minder as Kalmer, terwyl Zintle Xinewe derde is met 42 punte.
Bly op hoogte van al die jongste sportnuus deur Nuus24Sport op Twitter te volg.
- Sport24