Nuwe reëls wil ‘nog Casters’ voorkom
2010-07-09 08:16
Pretoria - Die Internasionale Vereniging van Atletiekfederasies (IAAF) beplan om sy reëls te verander om ’n herhaling van die Caster Semenya-sage te verhoed.
Daar is Donderdag vertroulik aan Sport24 gesê die IAAF het hom gedurende verlede jaar se Wêreldbyeenkoms in Berlyn in ’n situasie bevind waar Atletiek Suid-Afrika (ASA) aan hom gedikteer het wat hy mag doen. “ASA wou nie toelaat dat ons voortgaan om Semenya te toets nie en het ook ons aanbeveling om haar aan die byeenkoms te onttrek, geïgnoreer,” het die bron gesê.
“Dit het die IAAF magteloos gelaat, want ons reëls het nie vir so ’n situasie voorsiening gemaak nie. Daarom het ons ’n komitee van regskenners en mediese deskundiges aangestel om vir ons nuwe reëls op te stel.”
Die plan is dat die reëls op die IAAF se raadsvergadering in November goedgekeur sal word, wat sal beteken dat dit op 1 Januarie 2011 van krag word.
“Die nuwe reëls sal baie meer omvattend en beskrywend wees wat betref die identifisering, hantering en monitering van geslagskwessies by atlete.”
Na verneem word beplan die Internasionale Olimpiese Komitee ook om in Oktober ’n groot kongres aan te bied waar geslagskwessies in sport bespreek sal word.
Die plan is om wetgewing op te stel wat dit vir alle sportliggame duidelik sal maak hoe hulle ’n vraagstuk rondom ’n atleet se geslag moet hanteer.
Daar is duidelik ’n groot behoefte aan sulke wetgewing.
’n Afrigter van Limpopo, wat anoniem wil bly, het gesê hy weet van minstens nog drie atlete wie se vertonings die volgende jaar of twee tot groot omstredenheid kan lei as hulle begin presteer.
“Ons het probeer om die saak onder Limpopo Atletiek se aandag te bring, maar die beamptes verkies om dit te ignoreer.”
Richard Stander, administratiewe hoof van ASA, het vroeër vanjaar gesê die Semenya-geval kon beter gehanteer gewees het as die ou bestuur van ASA nie twee jaar gelede ’n skriftelike navraag om ondersoek in te stel, geïgnoreer het nie.
Oor beweerde probleme oor die geslag van drie “vroue-atlete” van Limpopo het Stander gesê ASA en die IAAF kan nie optree voordat hy nie skriftelike klagtes ontvang het nie.
* Sapa-AP berig dat Semenya op 15 Julie aan die Lappeenranta Spele in Finland gaan deelneem.
Bly op hoogte van al die jongste sportnuus deur Nuus24Sport op Twitter te volg.
- Sport24