Nóg 'n rekord vir Natalie
2010-04-15 09:31
Marizanne Kok
Durban - Natalie du Toit het gisteraand op die nasionale swembyeenkoms hier nog ’n wêreldrekord by haar reeds lywige versameling gevoeg.
Du Toit het die 50 m-vryslag in 31.98 sekondes voltooi en daarmee haar eie wêreldkerf in die gestremde S9-afdeling met meer as ’n halwe sekonde verbeter.
Die 25-jarige swem die wêreld aan die brand, en het die afgelope 10 dae reeds haar kaartjies na die Wêreld-oopwaterbyeenkoms en die Pan-Pasifiese byeenkoms bespreek.
Sy is daarby waarskynlik veilig vir die Statebondspele. In die 50-vryslag is sy in haar klas in dié stadium tweede in die wêreld en eerste in die 100-vryslag én die 100-vlinderslag.
Die Suid-Afrikaanse Sportkonfederasie en Olimpiese Komitee (Saskok) vereis dat individuele deelnemers vierde of beter in die Statebond moet wees om in Oktober in Indië deel te neem.
“Dis nou al ’n rukkie vandat ek laas ’n wêreldrekord opgestel het, so ek is baie, baie tevrede,” het Du Toit met ’n breë glimlag gesê.
Volgens haar kon sy voel sy is weer goed op dreef, “want ek het (Maandag) my vinnigste 200-vryslag in ’n jaar geswem”.
“Dis twee rowwe weke dié, waarin ek moet kwalifiseer vir ’n groot klomp byeenkomste, maar in dié stadium verloop alles goed.”
Du Toit het ook in gister se laaste nommer, die 1 500-vryslag, haar nasionale titel suksesvol verdedig in ’n vinnige 17:05.09.
Dit is die derde jaar agtereenvolgens dat sy dié nommer teen nie-gestremdes wen.
Suid-Afrika se groot kanonne het behoorlik stem dik gemaak en drie van hulle het aan die eerste vereiste vir insluiting in die Statebondspan voldoen.
Roland Schoeman het sy halfeindronde in die 50-vlinderslag in ’n blitsige 23.58 s voltooi om die kwalifiseringsvereiste van 23.73 te oortref.
Dié tyd is in die stadium op een na die beste van die jaar.
Cameron van der Burgh se 1:00.96 in die halfeindronde van die 100-borsslag het sy kaartjie na Indië verseker. Net drie mans was tot dusver vanjaar vinniger.
Jean Basson het goud in ’n opwindende 200-vryslagnommer voor die neuse van Darian Townsend en Sebastien Rousseau weggeraap en met 1:48.48 die kwalifiseringstyd met 0.24 sekondes oortref.
Ander gouemedalje-wenners was Gerhard Zandberg in die 50-rugslag, Taryn McKenzie (50-borsslag), .... in die 1 500-vryslag en Vanessa Mohr in die 50-vlinderslag.
Zandberg is een van die groot name oor wie se deelname aan die Statebondspele nou ’n groot wolk van onsekerheid hang.
Die kriteria stel dat swemmers net in die Statebond-span ingesluit kan word as hulle die kwalifiseringstyd vandeesweek oortref, maar Zandberg – wat op die vorige Spele brons in die 50-rugslag gewen het – was 0.42 sekondes stadiger as die vereiste.
-Sport24