Nóg 'n operasie ná F1-vrouejaer haar oog verloor
2012-11-29 18:11
Madrid – Die Spaanse Formule Een-renjaer Maria De Villota het nóg 'n operasie ondergaan om haar gesig op te bou nadat sy haar oog in 'n ongeluk verloor het, het haar familie gesê.
Die 32-jarige De Villota het haar regteroog verloor toe sy op 3 Julie tydens 'n oefensessie by die Duxfield-vliegveld in Cambridgeshire, Engeland, teen 'n spanvoertuig gebots het.
Sy het 'n operasie in Engeland ondergaan voor sy na Spanje teruggekeer het. Op 21 November het sy 'n sewe uur lange operasie in Madrid ondergaan, wat haar familie eers 'n week later bevestig het.
"Maria de Villota het 'n nuwe operasie ondergaan wat fokus op kranium- en okulêre herkonstruksie," lui 'n verklaring.
"Die doel is om toekomstige disfunksie weens die beserings wat sy opgedoen het, te verhoed."
Dokters het nuwe plate in haar skedel ingeplant en hulle is tevrede met haar toestand. Luidens die verklaring sal sy later nóg 'n "minder ernstige" operasie ondergaan.
De Villota is die dogter van die voormalige F1-renjaer Emilio De Villota en is in Maart as Marussia se toetsjaer aangestel.
Sy het in Oktober, ná 'n lang operasie vir ernstige kop- en gesigbeserings, by 'n mediakonferensie opgedaag met 'n oogklap.
– Volg Nuus24Sport op Twitter
- Sapa - AFP
