Nóg ’n geldeis teen Armstrong

2012-10-27 08:25

Austin, Texas - ’n Reklamemaatskappy in Dallas wil hê Lance Armstrong moet sowat R60 miljoen aan die maatskappy teruggee ná sy Tour de France-titels by hom teruggevat is.

SCA Promotions het die geld aan die fietsryer betaal nadat hy sy sesde Tour de France gewen het.

Luidens ’n woordvoerder sal die eis Maandag per brief aan Armstrong gestel word. Die beleerde fietsrylegende se prokureurs sê egter hulle het die eis verwag, en volgens die regspan het SCA ’n vrywillige ooreenkoms met Armstrong gehad, dus kan hulle nie die geld terugeis nie.

SCA wou Armstrong in 2005 nie betaal nie te midde bewerings dat hy destyds by opkikkers betrokke was. Die maatskappy het egter op die ou end besluit om te skik en wel te betaal.

Armstrong is onlangs deur die Internasionale fietsryvereniging van sy sewe Tour de France-titels gestroop nadat die Amerikaanse agentskap teen verbode middels (Usada) 'n verslag gepubliseer het met bewyse dat sy Tour-spanne deel was van 'n opkikkerprogram. Sy prysgeld, wat sowat R34 miljoen beloop, word ook nou teruggeëis. 

Volg Nuus24 op Twitter.