Nog ’n blitstyd vir LJ?
2011-05-31 08:30
Pretoria - LJ van Zyl se skittervertonings in die 400 m-hekkies gaan nie ongesiens verby nie.
Op die Internasionale Vereniging van Atletiekfederasies (IAAF) se webwerf word in een van die artikels na Van Zyl verwys as een van die atlete wat die meeste verbetering getoon het.
En met reg. Nie net het die Suid-Afrikaner al die beste atlete in dié nommer minstens een keer geklop nie, maar hy spog ook met die vier vinnigste tye ter wêreld tot dusver vanjaar. Sy vinnigste is 47.66 s (SA rekord).
Net voor 19:00 vanaand kan dit dalk die vyf vinnigste tye wees. Van Zyl neem in Ostrava, in die Tsjeggiese Republiek, aan die Golden Spike-byeenkoms deel.
Drie van sy teenstanders, die Amerikaners Kerron Clement (47.24 s) en Johnny Dutch (47.63 s) en die Brit David Greene (47.88 s), het ook al tye vinniger as 48 s opgestel. As die weer saamspeel, is ’n wentyd vinniger as 48.20 s nie uitgesluit nie.
Usain Bolt van Jamaika se tweestryd met sy landgenoot Steve Mullings in die 100m beloof ook ’n hoogtepunt te wees.
Mullings se 9.90 s is tot dusver die vinnigste in 2011, terwyl die 9.91 s wat Bolt verlede week in Rome gehardloop het, die naasvinnigste is. Bolt neem aan sy tweede wedloop in byna agt maande deel.
In Rome het hy swak weggespring en hy was gelukkig om ’n paar meter van die eindstreep af sy landgenoot Asafa Powell in te haal en verby te steek.
Lehann Fourie kan uit ’n Suid-Afrikaanse oogpunt ’n hoogtepunt in die 110-hekkies lewer. Hy het Sondag in Hengelo, Nederland, 13.56 s gehardloop. Dis net 0.04s stadiger as die kwalifiserende A-vereiste vir die Wêreldbyeenkoms in Daegu, Suid-Korea.
Volgens Fourie is hy tot beter in staat. “Ek het swak weggespring en my tegniek was ook nie wat dit moes wees nie. Maar ek is nie mismoedig nie. Dit was my eerste internasionale wedloop dié seisoen.”
Sunette Viljoen kan ook vir die Wêreldbyeenkoms kwalifiseer. In Rome het sy 60.61 m gehaal, wat 39 cm swakker as die kwalifiserende vereiste was.
Vir die jongste sportnuus volg Nuus24Sport op Twitter.
- Sport24