Nóg 'n Spele-atleet toets positief
2010-10-12 14:07
Nieu-Delhi - Die president van die Statebondspele, Mike Fennel, het Dinsdag bekend gemaak dat 'n tweede atleet in Nieu-Delhi positief getoets is vir 'n verbode middel.
Die hekkies-atleet Samuel Okon van Nigerië, wat sesde geëindig het in die 110m-finaal, het positief getoets vir die verbode middel methylhexanamine, het Fennel aangekondig.
Maandag is bekend gemaak dat Nigerië se Osayemi Oludamola, wenner van die 100m vir vroue, positief getoets is vir dieselfde verbode middel.
"Ons het nou sowat 1,200 opkikkertoetse uitgevoer en ongelukkig moet ek julle meedeel dat nog 'n atleet positief getoets is," het Fennel tydens 'n perskonferensie gesê.
Hy het bygevoeg dat 'n voorlopige verhoor Dinsdagmiddag sal plaasvind, maar dat Okon nie gevra het om sy B-monster te laat toets nie.
Die Spele se president het gesê dat sy span met die Nigeriese afvaardiging oor dié kwessie sal gesels en dat hy "tevrede is dat die saak baie ernstig opgeneem word".
Bly op hoogte van al die jongste sportnuus deur Nuus24Sport op Twitter te volg.
- Sport24