Nie net Groenpunt het sê oor F1-wedren
2011-07-08 09:33
Kaapstad – Inwoners van Groenpunt is nie die enigste belanghebbendes wat deur die Cape Town Grand Prix-bodmaatskappy tevrede gestel moet word nie.
Motorsport Suid-Afrika het ook vereistes aan die bodmaatskappy gestel indien hulle steun vir die Formule 1-straatwedren in Kaapstad wil hê.
Die Burger het Donderdag berig oor die bodmaatskappy se pogings om ’n straatwedren in Groenpunt te hou en die teenkanting van inwoners van die gebied.
Die regering se steun vir die projek word ook benodig om met die planne voort te gaan.
Die Formule Een-grootbaas, Bernie Ecclestone, het vandeesweek gesê ’n kontrak met een van die bodmaatskappye word gefinaliseer. Cape Town Grand Prix het dit teenoor Die Burger ontken.
Francois Pretorius, uitvoerende hoof van Motorsport Suid-Afrika, het gesê Ecclestone is daarvoor bekend dat hy uitlatings kwytraak om reaksie te ontlok.
“Ons sal die projek op sekere voorwaardes ondersteun.”
Dr. George Nyabadza, voorsitter van Motorsport Suid-Afrika se raad van direkteure, het gesê een van die voorwaardes is dat plaaslike renjaers aan die wedren deelneem of op grond van vernuf die kans gegun word om daar uit te kom.
“F1 geniet bitter min ondersteuning in lande waar daar geen plaaslike verteenwoordiging is nie. Daar sal net openbare belang en nasionale eenheid wees indien ons die reënboogvlag kan swaai.”
Nog ’n voorwaarde is ’n uiteensetting van presies hoeveel geld ingesamel sal word vir die ontwikkeling van motorsport in Suid-Afrika, veral in die afdelings vir vroue en die swart jeug.
Giniel de Villiers, wenner van die Dakar-tydren in 2009, het gesê daar is nie tans ’n realistiese kandidaat om met die intrapslag aan die wedren deel te neem nie.
“Plaaslike jaers word nie aan F1 blootgestel nie. Daar is nie geld agter hulle nie. Die probleem is by ons. Dit is ’n goeie idee om die plaaslike jaers te wil betrek. Hier is oorgenoeg talent en baie vernuf in Suid-Afrika. Daar is net nie genoeg ondersteuning vir die jaers nie.”
Jaers sal ook eers aan ander renne soos die GP2 moet deelneem voordat hulle vir F1 oorweeg word, het De Villiers gesê.
Vir die jongste sportnuus volg Nuus24Sport op Twitter.
– Sport24