Net een SA speler oor in enkelspel
2012-01-18 08:00
Melbourne – Die Suid-Afrikaanse tennisspeler Chani Scheepers het Dinsdag hier in die Australiese Ope moedig geveg in die eerste ronde, maar die Rus Svetlana Kuznetsova het haar eindelik met 6-3, 3-6, 6-0 uitgeskakel.
Kevin Anderson, wat Woensdag in die tweede ronde teen Sergiy Stakhovsky (Oekraïne) te staan kom, is die enigste Suid-Afrikaner oor in die enkelspel.
Novak Djokovic van Serwië het die verdediging van sy titel op uitstekende wyse begin, terwyl die Brit Andy Murray harder moes werk om die tweede ronde te haal.
Djokovic het die Italianer Paolo Lorenzi met 6-2, 6-0, 6-0 verslaan in ’n oorwinning wat só oortuigend was dat hy selfs ’n hou tussen sy bene deur kon speel om ’n punt te wen.
Murray, verlede jaar se naaswenner, moes terugveg om die Amerikaner Ryan Harrison met 4-6, 6-3, 6-4, 6-2 te klop.
Die Australiese veteraan Lleyton Hewitt was in ’n marathonstryd van vier uur betrokke in sy sege van 7-5, 6-4, 3-6, 7-5 oor die Duitse kwalifiseerder Cedrik-Marcel Stebe.
Daar was egter nie net goeie nuus vir die Aussies nie, want Samantha Stosur (6de gekeur), hul kampioen van die Amerikaanse Ope, is deur die Roemeen Sorana Cirstea met 7-6, 6-3 uitgeskakel.
Die Wimbledon-kampioen, Petra Kvitova, en die Rus Maria Sharapova, het sterk begin, met drie Fransmanne, Jo-Wilfried Tsonga, Gael Monfils en Richard Gasquet, wat tot die tweede ronde in die enkelspel deurgedring het.
Murray het die baie warm toestande as ’n skok vir sy gestel beskryf.
“Tog was dit goed om in die hitte te speel, want dit kan weer gebeur.”
Stosur, wat baie foute begaan het, het gesê haar vertoning was ’n groot teleurstelling.
Die 2de gekeurde, Kvitova, het die Rus Vera Dushevina met 6-2, 6-0 oorrompel, terwyl Sharapova die Argentyn Gisela Dulko ook in minder as ’n uur uit die pad gevee het (6-0, 6-1).
Kei Nishikori van Japan het Stephane Robert van Frankryk in skoon stelle geklop, terwyl die Kanadees met die reuse-afslane, Milos Raonic, slegs ses potte verloor het in sy sege oor die Italianer Filippo Volandri.
Die 5de gekeurde, die Spanjaard David Ferrer, het Rui Machado van Portugal verslaan, terwyl die Serwiër Viktor Troicki in vyf stelle oor ’n gewese kampioen van die Franse Ope, Juan Carlos Ferrero, geseëvier het.
– Sport24
– Bly op hoogte van al die jongste sportnuus deur Nuus24Sport op Twitter te volg
- Sapa - AP