Nadal wil tennisgeskiedenis maak
2010-08-31 09:15
New York. – Rafael Nadal is nie net hier in die Amerikaanse Ope op soek na sy negende Grand Slam-tennistitel nie, maar ook sy loopbaan-Grand Slam.
Die laaste Grand Slam-toernooi van die jaar het reeds gister hier op Flushing Meadows afgeslaan.
Die voorste speler in die wêreld sal vandag sy veldtog teen Rusland se Teymuraz Gabashvili begin.
Die Spanjaard het reeds vanjaar die Franse Ope én Wimbledon gewen, maar nog nooit verder as die halfeindronde van die Amerikaanse Ope gevorder nie. Sy beste vertonings was in 2008 en 2009.
Wen hy vanjaar sal die 24-jarige Nadal die jongste speler word wat al vier Grand Slam-titels verower en die sewende man ná Don Budge, Fred Perry, Roy Emerson, Rod Laver, Andre Agassi en Roger Federer.
Gepraat van Federer.
Die naasbeste speler in die wêreld het verlede jaar die eerste keer in die eindstryd (teen Juan-Martin del Potro in vyf stelle) verloor ná vyf agtereenvolgende seges.
Vanjaar probeer die Switser om die eerste speler in die Ope-era te word wat ses titels hier wen én om hom by Ivan Lendl aan te sluit as die enigste ander speler wat in sewe agtereenvolgende eindstryde speel.
Federer het met sy sege in die Cincinnati-meesterstoernooi, ’n week voor die laaste Grand Slam-toernooi van die jaar begin het, die eerste keer sedert die Australiese Ope ’n toernooi gewen. Die Switserse maestro en Nadal het nog nooit hier in die eindstryd gespeel nie.
Die verdedigende kampioen, die tweede gekeurde Kim Clijsters van België, het haar veldtog op ’n wennoot begin.
’n Voormalige finalis hier, Juan Carlos Ferrero (Sp, 22), het sy plek in die tweede ronde bespreek saam met Nikolay Davydenko (Rus, 6), Marin Cilic (Kro, 11) en Richard Gasquet (Fr).
- Die Amerikaanse Ope word op ESPN op DStv uitgesaai. Regstreekse aksie begin elke dag om 19:00 en die aandskof om 01:00. Elke oggend om 09:00 word hoogtepunte van die vorige dag ook uitgesaai.
Bly op hoogte van al die jongste sportnuus deur Nuus24Sport op Twitter te volg.
- Reuters