Nadal weer op koers ná besering
2013-02-06 09:11
Vina Del Mar, Chili – Rafael Nadal het vir die eerste keer in sewe maande weer ‘n wedstryd gespeel ná 'n ernstige kniebesering hom gedwing het om 'n blaaskans te neem.
Nadal, wat al maande behandeling ontvang vir dié besering, het Dinsdag sy terugkeer met ‘n oorwinning in 'n dubbelspel-wedstryd saam met Juan Monaco by die VTR-ope in Chili gevier.
Die Spanjaard het op 28 Junie 2012 laas gespeel, toe hy in die tweede ronde van Wimbledon uitgeskakel is deur die ongekeurde Lukas Rosol.
Nadal en Monaco het Frantisek Cermak en Lukas Dlouhy met 6-3, 6-2 verslaan.
Die voormalige nommereen-speler wou egter nie na die wedstryd vrae oor sy knie beantwoord nie.
“Die knie, soos ek gesê het toe ek hier aangekom het... ek verkies om nie daaroor te praat nie,” het Nadal by 'n mediakonferensie gesê.
“Op die ou end het die dokters gesê dit is reg. Daar is nie ‘n risiko dat ek [die besering] sal vererger nie. My knie pyn steeds, maar ek is gelukkig dat ek hier kan speel.”
“Ek is nog nie 100% nie, ek kort nog ‘n paar weke. Ek is hier om tennis te speel, met of sonder pyn en ek is gelukkig dat ek weer ‘n amptelike wedstryd kon speel.”
– Vir die jongste sportnuus volg Nuus24Sport op Twitter.
- Sapa - AP
