Nadal veg om sege
2011-05-25 07:49
Parys. – Suid-Afrika se Kevin Anderson het Dinsdag sy eerste oorwinning tot nog toe hier op die rooi klei van Roland Garros behaal, op ’n dag waarin Rafael Nadal se verdediging van sy kroon so byna vroeg beëindig is.
Anderson, die 32ste gekeurde, het die Fransman Nicolas Mahut met 6-4, 6-4, 6-7 (6/8), 6-3 geklop danksy ’n oorheersende vertoning op sy eie afslaan.
Die Suid-Afrikaner het 22 kishoue afgeblits en 80% van die punte op sy eerste afslaan gewen. Hy het 64 wenhoue geslaan en 5 van die 17 deurbraak-kanse benut. Anderson kom in die volgende ronde teen die Argentyn Juan Ignacio Chela te staan.
Mahut was die verloorder in verlede jaar se epiese Wimbledon-stryd van 11 uur teen die Amerikaner John Isner. En soos Isner tóé die kollig met ’n merkwaardige sege gesteel het, het hy dit Dinsdag byna weer gedoen.
Die kanonpoot-Yank het teen Nadal gespeel en hom vir vier uur en vyf stelle aan die raai gehou.
Nadal, wat verlede jaar nie ’n enkele stel op Roland Garros verloor het nie en nooit voorheen meer as drie stelle in ’n eersteronde-stryd benodig het nie, het in ekstase in die lug gespring nadat hy met 6-4, 6-7 (2/7), 6-7 (2/7), 6-2, 6-4 gewen het.
“Tres, tres difficile!” het die Spanjaard in Frans gesê. “Hy was ’n baie, baie moeilike teenstander. Sy afslaan is soms onkeerbaar.
Ek sal verkies om alles in drie stelle te wen, maar ek probeer positief bly en dalk help (dié moeilike wedstryd) my.”
In ander uitslae het die vierde gekeurde, Andy Murray, die Franse kwalifiseerder Eric Prodon met 6-4, 6-1, 6-3 uitgeskakel, terwyl die Sweed Robin Soderling (vyfde gekeur) geswoeg het om die Yank Ryan Harrison met 6-1, 6-7 (5/7), 6-3, 7-5 te klop.
Die Spanjaard Nicolas Almagro (11de gekeur) is uitgeskakel.
Die Pool Lukasz Kobot het hom met 3-6, 2-6, 7-6 (7/3), 7-6 (7/5), 6-4 geklop.
In die vroue-afdeling het twee van die groot gunstelinge, die Rus Maria Sharapova en die Belg Kim Clijsters, sonder moeite tot die tweede ronde deurgedring, maar die voormalige kampioen Ana Ivanovic het haar tasse gepak.
Sharapova het net 56 minute nodig gehad om die Kroaat Mirjana Lucic met 6-3, 6-0 uit haar pad te vee. Die sewende gekeurde Rus het haar aanslag op ’n eerste Roland Garros-kroon begin met ’n goeie vertoning waarin sy 94% van die punte op haar eerste afslaan en al nege die laaste potte gewen het.
Clijsters was soms haar eie grootste vyand in haar oorwinning van 6-2, 6-3 oor Anastasiya Yakimova van Belarus.
Die tweede gekeurde het 30 ongedwonge foute gemaak, teenoor 21 wenhoue, en die minder geroemde Yakimova drie keer toegelaat om deur te breek.
Ivanovic, die Franse Ope-kampioen in 2008, het met 7-6 (7/3), 0-6, 6-2 teen die Sweed Johanna Larsson vasgeval.
Die 20ste gekeurde Serwiër het gesê sy het las gehad van ’n seer pols en ’n maagspierbesering.
Victoria Azarenka (vierde) en Na Li (sesde) het deurgedring tot die tweede ronde nadat albei met Tsjeggiese vroue afgereken het.
Vir die jongste sportnuus volg Nuus24Sport op Twitter.
- Sapa - AFP