Nadal staal hom vir Djokovic se aanslag
2011-04-20 10:10
Barcelona – Rafael Nadal is slaggereed om Novak Djokovic se aanslag op sy wêreldranglys-posisie af te weer.
Die 24-jarige Nadal, die voorste tennisspeler in die wêreld, het die naweek sy sewende agtereenvolgende Meesterstoernooi in Monte Carlo gewen en jag dié week sy sesde titel hier in Spanje.
Die Spanjaard is tans 3 230 punte voor Djokovic op die wêreldranglys, maar Nadal het 4?000 punte om te verdedig in die komende maand en ’n half ná sy seges verlede jaar in Monte Carlo, Madrid, Rome en die Franse Ope.
Dít terwyl die Serwiër, wat tans die naasbeste speler in die wêreld is, maar net 540 punte moet verdedig.
“Elke jaar beleef ek ’n goeie kleibaan-seisoen. Ek moet nou probeer om dit net wéér te doen,” het Nadal gesê.
Nadal het ’n ongelooflike rekord op kleibane. Hy het sy afgelope 29 wedstryde op dié oppervlak gewen en het sedert 2005 nog nie in April verloor nie.
Die huidige kampioen in die Franse Ope, Wimbledon en Amerikaanse Ope is die eerste wat erken dat statistieke soos dié nie volgehoue sukses waarborg nie.
“Ek is nie onoorwinlik nie. Ek het al verloor en ek gaan in die toekoms nog wedstryde verloor. Niemand is perfek nie,” het Nadal gesê.
Djokovic, wat vanjaar nog nie gestuit kon word nie en met 24 agtereenvolgende seges spog, sal volgende week sy kleibaan-seisoen begin.
Nadal en Djokovic het vanjaar al twee keer teen mekaar te staan gekom en elke keer het Djokovic teruggeveg van ’n stel agter om die Miami- en Indian Wells-meesterstoernooie te wen.
Volgens Nadal kan hy nie nou al fokus op moontlike wedstryde teen Djokovic nie, want al wanneer hulle paaie gaan kruis, is in die eindstryd van ’n toernooi.
“Djokovic het die jaar goed begin en ek sien geen rede hoekom dié nie sy seisoen gaan wees nie.”
– www.atpworldtour.com
Volg Nuus24Sport op Twitter.
- Die Burger