Nadal se Rafa Slam-droom verpletter
2011-01-26 14:17
Melbourne - Rafael Nadal se droom om vier Grand Slam-titels in een jaar te wen, is in skerwe nadat hy Woensdag in die kwarteindronde van die Australiese Ope deur sy landgenoot en goeie vriend David Ferrer uitgeskakel is.
Ferrer het die kragmeting met 6-4, 6-2 en 6-3 gewen.
Die sewende gekeurde Spanjaard sal Andy Murray van Brittanje in Vrydag se halfeindstryd ontmoet.
Nadal het las van 'n besering gehad toe hy sy dyspier tydens die tweede pot van die eerste stel seergemaak het.
Daarna moes die wêreld se beste mansspeler deurgaans mediese behandeling ontvang.
Dit is Ferrer se tweede verskyning in 'n Grand Slam-halfeindstryd. Hy het ook in 2007 die laaste agt van die Amerikaanse Ope gehaal.
"Dit was glad nie maklik nie. Rafael is 'n ware heer én ons is vriende," het Ferrer gesê. (Nadal het uit respek vir sy vriend die wedstryd voltooi eerder as om Ferrer die oorwinning weens 'n ontrekking te gee.)
"Hy het in die eerste stel al seergekry. Maar ek het net aanhou bly speel," het Ferrer bygevoeg.
Vir die jongste sportnuus volg Nuus24Sport op Twitter.
- Sport24