N-Ier looi groot name in Skotland
2011-10-03 08:31
Bloemfontein – Drie wenners van gholf se grotes was Sondag tot laat in die pylvak aan die stry om die titel in die Alfred Dunhill-linkstoernooi in Skotland voordat Michael Hoey van Noord-Ierland met die kroon weggestap het.
Toe die drie major-wenners Sondag voet in die hoek moes sit vir ’n sege, het Suid-Afrika se Louis Oosthuizen en Noord-Ierland se Graeme McDowell en Rory McIlroy se brandstof opgeraak.
Hoey het rondtes van 66, 66, 66 en 68 vir ’n wentelling van 266 – 22 houe minder as die baansyfer, gespeel.
Nadat hy gister 35 houe oor sy eerste nege gespeel het, het hy voëltjies op die 15de, 16de en 18de putjies behaal om met 33 houe oor die laaste nege putjies sy sege te verseël.
McIlroy het ná rondtes van 70, 67 en 66 sy beste vir laaste gehou.
Dié Noord-Ier het gister sy eerste nege in 30 houe voltooi .
Dit het vier voëltjies ingesluit en hy het op die derde putjie (syfer vier) sy tweede hou in die blikkie geslaan.
Sy vierde rondte van 65 en ’n telling van 268 was eindelik net goed genoeg vir die tweede plek.
McDowell het gisteroggend as een van die gesamentlike voorlopers afgeslaan.
Sy 69 vir ’n telling van 270 het hom in die gesamentlike derde plek laat eindig.
Oosthuizen sal nog lang trane huil dat hy nie gister op een van sy gunsteling-bane, die Old Course op St. Andrews, geseëvier het nie.
Ná rondtes van 66, 67 en 69 het hy gehoop om sy tweede sege vanjaar te behaal nadat hy in Januarie die Afrika-ope gewen het.
Maar die Suid-Afrikaner se brouhoue op die 12de en 13de putjies het ’n vroeë einde aan sy aanspraak op die titel gemaak. Hy het ’n laaste rondte van 69 vir ’n telling van 271 – 17 houe minder as baansyfer, gespeel. Sy goeie peil die laaste paar dae op die bane van St. Andrews, Carnoustie en Kingsbarns kan egter baie vir sy selfvertroue beteken.
Ander Suid-Afrikaners wat ook skaflik vertoon het, was Charl Schwartzel (-15), Jaco van Zyl (-15), Alex Haindl (-13), Thomas Aiken (-10) en Ernie Els (-7).
Vir die jongste sportnuus volg Nuus24Sport op Twitter.
– Sport24
