Murray wil ophou vloek op tennisbaan

2012-12-08 11:36

Londen – Die Amerikaanse Ope-kampioen Andy Murray het belowe om op te hou vloek wanneer hy op die tennisbaan is.

Die Skot is al voorheen gewaarsku oor sy taal tydens wedstryde, maar hy glo die nie-Engelssprekende kom weg met erger uitbarstings omdat die skeidsregters nie kan verstaan wat hulle sê nie.

"Natuurlik is dit sleg en verkeerd om te vloek en dis is iets waarmee ek wil ophou," het Murray volgens die Skotse koerant Daily Record gesê.

"Maar dit is glad nie so sleg soos sommige van die buitelandse spelers se uitbarstings nie. Ek wil nie name noem nie, maar sommige van die goed wat hulle sê is afgryslik.

"Dis net dat al die skeidsregters Engels praat."

Murray, wat Groot Brittanje se eerste manlike Grand Slam-wenner in 76 jaar geword het toe hy vroeër vanjaar die VSA Ope gewen het, het gesê hy sal by volgende maand se Australiese Ope probeer om minder te vloek.

Die 25-jarige is vroeër vanjaar 'n amptelike waarskuwing gegee by die Meesterstoernooi in Rome en is ook verlede jaar gewaarsku oor sy taal by die Meesterstoernooi in Parys.

– Volg Nuus24Sport op Twitter

- Sapa - AFP