Mosselbaaier beïndruk by Britse Ope
2010-07-16 09:04
Johannesburg - En dít, liewe leser, is hoe die berugte Ou Baan in St. Andrews lyk ná ’n dag sonder wind: bloedneus, weerloos en dronk getimmer deur die voorste spelers in die wêreld.
“Die Ou Dame het geen klere aan nie,” het die veteraan Tom Watson gistermiddag met ’n wrede glimlag gespot.
“Ons gaan nie gou weer so ’n maklike dag op hierdie gholfbaan hê nie,” was Rory McIlroy se opsomming.
Skotland se beroemdste gholfbaan het op die eerste dag van die 150ste Britse Ope haar sagter kant gewys en die bestes in die wêreld toegelaat om te baljaar.
En het hulle dit nie geniet nie. Hulle móés.
Soos McIlroy tereg gesê het: die res van die week sal dit waarskynlik nie weer so lekker daar buite wees nie.
“Ons almal het geweet ons moet die beste gebruik maak van die goeie weer. Die baan was reg om uitmekaar geruk te word.”
McIlroy het verdien om so grootbek te praat.
Hy is die voorloper nadat hy die laagste eersteronde-telling in die geskiedenis van die majors (63) opgestel het.
Dié Ier het ’n arend en sewe voëltjies aangeteken en sy goeie peil op dié baan gehandhaaf.
Hy het nog nooit meer as 69 op die Ou Baan aangeteken nie.
Dit was egter nie net McIlroy wat die “makker” Ou Baan waardeer het nie. Louis Oosthuizen, ’n 27-jarige Mosselbaaier, wat vroeër vanjaar die eerste keer in Europa gewen het, het die Ou Dame ook aan die keel beetgekry en agt voëltjies afgeblits vir ’n 65.
Hy is net twee houe agter McIlroy. In drie vorige verskynings kon Oosthuizen nog nooit die afsnypunt oorleef nie.
Gister het hy óf iets anders oor sy brêkfis gegooi óf iets anders in sy gholfsak gedra.
Wat ook al die rede, die uitslag was skouspelagtig.
Die grootste verrassing was die vertoning van die 44-jarige John Daly.
Dié omstrede Amerikaner het die Ope 15 jaar gelede teen die verwagtinge in hier gewen, maar was sedertdien in die nuus om al die verkeerde redes.
Sy gewig, ’n kroeggeveg buite Hooters, deesdae ’n verhouding met ’n Hooters-kelnerin ...
Daly het gister ’n nuwe hoofstuk geskryf.
Geklee in ’n uitrusting so kleurvol soos hyself – pienk, pers, lemmetjiegroen en baba-blou – het hy die “kleurvolste” gholf in die oggendsessie gespeel en weggestap met sewe voëltjies en ’n rondte van 66.
Naas Oosthuizen is Trevor Immelman die voorste Suid-Afrikaner, danksy ’n 68.
Ernie Els en Retief Goosen was bestendig vir rondtes van 69.
Bly op hoogte van al die jongste sportnuus deur Nuus24Sport op Twitter te volg.
- Sport24