Monfils deur tot kwarteind
2010-09-07 08:25
New York. – Gael Monfils is die eerste Fransman sedert 2000 wat daarin geslaag het om tot die kwarteindronde van die Amerikaanse Ope-tennistoernooi hier deur te dring.
Monfils het sy landgenoot Richard Gasquet gister hier op Flushing Meadows met 6-4, 7-5, 7-5 geklop om sodoende tot die uitklopfase deur te dring.
Monfils sal teen die wenner van die ander wedstryd in die vierde ronde – die derde gekeurde Novak Djokovic van Serwië, of die 19de gekeurde Amerikaner Mardy Fish – in ’n kwarteindstryd te staan kom.
Dit is maar die derde keer dat die 17de gekeurde Fransman tot die uitklopfase van ’n Grand Slam vorder.
Hy is in 2008 in die halfeindronde en verlede jaar in die kwarteindronde elke slag deur Switserland se Roger Federer uitgeskakel.
“Dit is ongelooflik om voor die Amerikaanse skare in ’n kwarteindronde te kan speel,” het Monfils gesê.
Brittanje se Andy Murray het in sy kragmeting met Switserland se 25ste gekeurde Stanislas Wawrinka met 6-7 (3), 7-6 (4), 6-3, 6-3 vasgeval.
Die eerste gekeurde Rafael Nadal van Spanje het sy wedstryd in die derde ronde teen Gilles Simon van Frankyk met 6-4, 6-4 en 6-2 gewen.
In die vroue-afdeling mag Australië se Samantha Stosur op die randjie van haar groot deurbraak in ’n Grand Slam-toernooi wees, maar die Amerikaanse Ope-kampioen Kim Clijsters beplan nie om haar jongste slagoffer te word nie.
Die tweede gekeurde Belg is in 18 wedstryde hier onoorwonne en kom in die een kwarteindronde teen Stosur te staan.
Die wenner sal in Vrydag se een halfeindronde teen die wenner tussen die derde gekeurde Amerikaner Venus Williams en sesde gekeurde Francesca Schiavone te staan kom.
Stosur het die eerste Aussie vrouespeler sedert Wendy Turnbull in 1986 geword om tot die kwarteindronde deur te dring.
Dominika Cibulkova van Slovakye het tot die kwarteindronde deurgedring toe sy 7-5, 7-6 (7/4) met Rusland se Svetlana Kuznetsova afgereken het.
Bly op hoogte van al die jongste sportnuus deur Nuus24Sport op Twitter te volg
– Sport24
- Sapa - AFP