Mokoka wen SA se 1ste
2011-08-18 07:02
Pretoria – Stephen Mokoka het Woensdag op die Wêreld-studentespele in Sjenzen, China, Suid-Afrika se eerste atletiekmedalje verower toe hy tweede in die 10 000 m geëindig het.
Suguru Osako van Japan het in ’n tyd van 28:42.83 gewen. Mokoka se tyd was 28:53.09. Ahmed Tamri van Marokko was derde in 29:06.20. Gladwin Mzazi, die Studentekampioen, was sesde in ’n tyd van 29:34.65.
Simoné du Toit was in die eindronde van die diskusgooi vir vroue agtste met ’n afstand van 53.97 m.
Zaneta Glanc van Pole het met ’n gooi van van 63.99 m seker gemaak die goue medalje is hare.
Simon Magakwe, die Suid-Afrikaanse kampioen, was in die 100 m-eindronde sewende in ’n tyd van 10.49 s. Jacques Harvey van Jamaika het in 10.14 gewen.
Nolene Conrad was eintlik die enigste ander Suid-Afrikaanse atleet wat in die hitte en humiditeit kon kophou. Dit was meer ’n geval van woord hou.
Voor dié span se vertrek het sy vol selfvertroue voorspel dat sy die 3000-hindernis in vinniger as 10 minute gaan voltooi. Dit is presies wat sy gedoen het.
Conrad het in haar uitdun ’n tyd van 9:59.89 opgestel, wat amper ses sekondes vinniger as haar vorige beste tyd van 10:05.30 is.
Sy is maar die derde Suid-Afrikaanse atleet wat daarin slaag om die 3 000-hindernis in ’n tyd van onder 10 minute af te lê.
Tebogo Masehla (9:54.19) en Angela Wagner (9:58.68) is die ander twee atlete wat met tye van vinniger as 10 minute spog.
Volgens Conrad was dit belangrik om vir haarself te bewys sy kan deur die 10 minute-grens breek.
“Dit is wat my dryf elke keer wanneer ek deelneem.”
In die 3 000-hindernis se uitdunne vir mans het Tshepo Molepo (8:50.05) en Dean Brummer (8:53.52) albei seker gemaak hulle dring deur.
PC Beneke is ook deur na die volgende ronde met sy tyd van 51.92 in die 400-hekkies.
Beneke sê hy het net één doelwit en dit is ’n plek in die eindronde.
“Verlede jaar was nie ’n maklike jaar nie omdat ek heelwat las van beserings gehad het, maar gelukkig is dit nou iets van die verlede. Ek voel beslis sterker en vinniger.”
Beneke is stilweg vol vertroue dat hy op die Studentespele die eerste keer daarin sal slaag om ’n tyd van vinniger as 50 sekondes op te stel.
– Sport24
– Bly op hoogte van al die jongste sportnuus deur Nuus24Sport op Twitter te volg