Mokoena is hoopvol
2012-01-25 07:05
Pretoria – “Khotso Mokoena is klaar met atletiek.”
Dié gerug is verlede jaar ’n paar keer gehoor toe Mokoena nie op die Wêreldbyeenkoms in Daegu, Suid-Korea, vir die verspring-eindronde gekwalifiseer het nie.
Gelukkig vir Suid-Afrikaanse atletiek steek daar geen waarheid in dié gerug nie.
“Ek het ook die stories gehoor dat ek gaan uittree en kan maar net daaroor lag,” het Mokoena Dinsdag gesê.
“Waarom sal ek nou wil uittree? Ek word vanjaar maar eers 27 en as ek myself oppas, kan ek totdat ek 36 is bly deelneem.
“Ek glo in God en die talent wat hy my gegee het. Dit is regtig vir my belangrik om die meeste daarvan te maak.
“Ek twyfel nie dat ek weer vir Suid-Afrika ’n medalje op die Olimpiese Spele sal kan wen nie.
“Ek is beslis sterker en fikser as wat ek voor 2008 se Olimpiese Spele in Beijing was.”
Mokoena hoop ook om weer eens ’n medalje op die Binnenshuise Wêreldbyeenkoms (9-12 Maart) in Istanboel, Turkye, te wen.
Hy was in 2008 die kampioen en in 2010 het hy ’n silwermedalje gewen.
As deel van sy voorbereiding vir die Binnenshuise byeenkoms gaan Mokoena vier keer internasionaal deelneem.
Sy eerste byeenkoms is aanstaande week (5 Februarie) in Moskou en daarna 10 Februarie in Düsseldorf, 18 Februarie in Birmingham en 23 Februarie in Stockholm.
Die groot vraag op elke atletiekliefhebber se lippe is of Mokoena al daarin kon slaag om die tegniese foute in sy aanloop uit te stryk.
Dié probleem het Mokoena verlede jaar groot frustrasie besorg.
Sy grootste teleurstelling was toe hy nie in Suid-Korea vir die verspring-eindronde kon kwalifiseer nie.
Sy beste afstand in die uitdunne was 8m.
Dit het maar sleg afgesteek teen die 8.47 waarmee hy op die Wêreldbyeenkoms in 2009 in Berlyn, Duitsland, die silwermedalje gewen het.
Kenners wat Mokoena in aksie gesien het, is dit eens dat hy te vinnig op die plank afkom en daarom sukkel om reg vas te trap.
As Mokoena die slag reg vastrap, gaan hy vlieg, is die algemene voorspelling.
Volgens Mokoena het hy en sy afrigter, Hansie Coetzee, die laaste weke hard aan sy aanloop gewerk.
“Dit is beslis beter, maar nog nie 100 persent nie. Wat belangrik is, is dat ek meer selfvertroue het wanneer ek my aanloop doen.
“Ek twyfel nie dat my aanloop perfek by die Spele sal wees nie.”
– Sport24
– Bly op hoogte van al die jongste sportnuus deur Nuus24Sport op Twitter te volg