Mokoena in met kans
2010-03-13 02:17
Pretoria - Khotso Mokoena is die enigste atleet wat ’n realistiese kans het om vir Suid-Afrika ’n medalje op die Binnenshuise Wêreld-atletiekbyeenkoms in Doha, Katar te wen.
Twee jaar gelede in Spanje het Mokoena die goue medalje op die Binnenshuise byeenkoms met ’n sprong van 8.10 m gewen.
Dit is moeilik om te voorspel waartoe Mokoena op die oomblik in staat is, want hy was nog glad nie vanjaar onder dak in aksie gewees nie.
Mokoena het nog net twee keer vanjaar deelgeneem. Die eerste keer was op die Geelbladsye-byeenkoms in Durban toe hy 8.22m met ’n sterk wind van agter gespring het.
In Potchefstroom het hy met ’n sprong van 7.93 gewen.
Mokoena het homself die afgelope drie jaar bewys as Suid-Afrika se enigste atleet wat nie op die groot byeenkomste kop verloor nie.
Die Suid-Afrikaanse rekord (8.50) wat hy verlede jaar gespring het, is net deur Dwight Phillips van die VSA met ’n sprong van 8.74 m oortref en Panama se Olimpiese kampioen en voormalige Wêreldkampioen, Irving Saladino, met ’n sprong van 8.63m.
Wat teen Mokoena kan tel, is die feit dat hy jaarliks van afrigters verander. In 2008, toe hy goud in Valencia gewen het, was Angus Pohl sy afrigter en verlede jaar in Berlyn was Elna de Beer die breier.
Albei het ná minder as ’n jaar bedank nadat hul verhouding met Mokoena versuur het.
Dalk net soos op die wêreldbyeenkoms in Berlyn kan daar dié naweek weer twee Suid-Afrikaners op die wennerspodium staan.
Karin Mey, wat vroeër vanjaar met haar afrigter, Charley Strohmenger, getroud is, het verlede jaar die bronsmedalje vir Turkye gewen.
Mey-Strohmenger het in Februarie in Moskva 6.52 m gespring.
- Sport24