Minister nader VN oor Semenya
2009-09-14 12:14
Johannesburg - Die Suid-Afrikaanse regering het ‘n brief aan die Verenigde Nasies (VN) gerig waarin hulle die manier waarop daar teenoor Caster Semenya opgetree word, bevraagteken.
Noluthando Mayende-Sibiya, minister van vroue, kinders en gestremdes het ‘n brief aan die VN se afdeling vir vrouebemagtiging (DAW) geskryf waarin sy beweer Semenya se menslikheid is aangetas.
Sy bevraagteken of dié manier waarop daar teenoor Semenya opgetree word ooreestem met die prosedures wanneer dit kom by geslagsgelykheid.
Die 18-jarige sportwetenskapstudent se loopbaan is in omstredenheid gedompel nadat haar geslag bevraagteken is sedert haar oorwinning in die 800m-item in Berlyn.
‘n Australiese koerant het verlede week berig dat Semenya na bewering beide manlike en vroulike geslagsorgane beskik.
Die Internasionale Vereniging van Atletiekfederasies (IAAF) het nog geen kommentaar hierop gelewer nie.
Intussen glo Mayende-Sibiya die saak oorskry die VN se vereistes vir die beskerming en die bevordering van vroueregte.
"Die gelyke geleentheid om in sport deel te neem, of dit nou vir die kompetisie óf die genot daarvan is, is die reg van alle vrouens, mans en kinders.
"Ek wil daarom ‘n versoek aan die VN rig om die saak te ondersoek, omdat die voorval nadelige gevolge vir vrouens wat in sport wil deelneem, kan inhou,” het sy in ‘n brief aan Carolyn Hannan, die direkteur van DAW geskryf.
- Sapa