Messi 'n 'reus'
2012-12-11 07:14
Berlyn – Die Duitse sokkerlegende Gerd Müller het Lionel Messi van Argentinië as ’n “reus” beskryf nadat hy Müller se rekord vir die meeste doele in een kalenderjaar, wat 40 jaar staande gebly het, verpletter het.
“My rekord van 85 doele in 60 wedstryde, wat sedert 1972 staan, is deur die beste speler in die wêreld, Lionel Messi, (tot 86) verbeter. Ek is baie bly vir hom,” het Müller volgens ’n woordvoerder van ’n voormalige klub, Bayern München, gesê.
Müller het ook gesê Messi is “’n ongelooflike speler, ’n reus wat terselfdertyd baie gaaf en ’n afgeronde beroepspeler is”.
Messi het Sondag eers Müller se rekord geëwenaar en toe verbygesteek met 2 doele in die eerste helfte van Barcelona se kragmeting met Real Betis.
“Ek hoop hy teken nog ’n doel of twee aan in die wedstryde wat in 2012 oorbly en dat sy rekord vir die volgende 40 jaar sal staande bly,” het Müller bygevoeg.
Messi het ook al die rekord vir die meeste doele in een seisoen in die Spaanse sokkerliga (50) behaal.
– Lees hier meer.
– Vir die jongste sportnuus volg Nuus24Sport op Twitter.
- Sapa - AFP
