Malema: Wit vroueatlete is lelik
2009-08-23 08:02
Durban – Die internasionale atletiekbeheerliggaam (IAAF) se besluit om ‘n geslagstoets op Caster Semenya uit te voer, is rassisties en seksisties.
Dit was Saterdag die woorde van Julius Malema, leier van die ANC Jeugliga (ANCYL), by die liga se streekskonferensie in Durban.
Die IAAF wil Semenya, Suid-Afrika se 800m vir vroue wêreldkampioen, se geslag toets omdat sy swart is en omdat sy haar wit teenstanders geklop het, het Malema gesê.
Die kontroversiële leier van die ANCYL het voorts gesê daar is baie wit vroueatlete wat soos mans lyk. Dié atlete is boonop lelik, het Malema gesê.
Volgens Malema mag die Suid-Afrikaanse regering nie toelaat dat die geslagtoetse op die atletiekster uitgevoer word nie.
Hy het gesê die ANCYL sal nie toelaat dat wit mense aanhou om swartes soos ape te behandel nie.
“Sy moet haar medalje teruggee. Ons sal haar ‘n ordentlike goud hier in Suid-Afrika gee," het Malema gesê.
- Sapa