Louis ewenaar rekord in China
2011-11-05 07:14
Wildekus - Louis Oosthuizen het die Sheshan-gholfbaan in Sjanghai gister behoorlik bloedneus geslaan om ná die tweede ronde van die HSBC-kampioenskapstoernooi net ’n enkele hou agter die voorloper te wees.
Oosthuizen, verlede jaar se Britse Ope-kampioen, het die baanrekord van 63 (nege houe minder as baansyfer) geëwenaar met ’n foutlose vertoning wat nege voëltjies opgelewer het.
Dit is dié Suid-Kapenaar se beste telling tot nog toe in die PGA-reeks.
Oosthuizen (134 houe) is een van 16 spelers binne ses houe van die voorloper, die Sweed Fredrik Jacobson (133) , wat ’n 66 aangeteken het. Hy deel die tweede plek met die Australiër Adam Scott, wat 65 houe in die tweede ronde gespeel het.
’n Verdere hou terug is die eersteronde-voorloper, die PGA-kampioen, Keegan Bradley, en ’n hou agter hom is die wenner van verlede week se Asia Pacific-kampioenskapstoernooi, Bo van Pelt, en die Engelsman Paul Casey.
Oosthuizen speel vanjaar die eerste keer in die Amerikaanse PGA-reeks. Hy het egter die grootste deel van die jaar oninspirerend vertoon, maar het in die afgelope paar weke sy goeie spelpeil van 2010 begin herwin. Gister het hy uitmuntend vertoon.
Sy herstel ná ’n eerste ronde van 71 het gister vroeg begin met voëltjies op die tweede en derde putjies.
En hy het dit opgevolg met drie voëltjies in ’n ry, tussen die sesde en agtste putjies.
Vier voëltjies oor die laaste nege – waarvan een op die 13de ná ’n lang sethou – het sy dag vervolmaak.
“Ek dink nie ek het al ooit ’n 63 (in ’n toernooi) aangeteken nie,” het die Suid-Afrikaner volgens Eurosport gesê. “Ek kon dalk al ’n 62 in ’n toernooi aangeteken het, maar die laaste keer dat ek ’n 63 gespeel het, was waarskynlik op my plaaslike gholfbaan in Suid-Afrika. Ek kan nie onthou van een setperk wat ek vandag (gister) nie in regulasie-houe bereik het nie; en ek het die bal baie goed geslaan. Dit was ’n goeie, soliede dag.”
Die Amerikaanse Meesterskampioen, Charl Schwartzel, is ses houe agter Jacobson ná ’n 69 en sy landgenote Rory Sabbatini (69) en Jbe’ Kruger (70) ’n verdere hou terug.
Keith Horne is agt houe agter ná ’n 70 en Ernie Els se telling is gelyk aan baansyfer danksy ’n 69.
Thomas Aiken is egter op een na laaste nadat hy ’n eerste ronde van 76 met ’n 75 opgevolg het.
– Sport24
– Vir die jongste sportnuus volg Nuus24Sport op Twitter