Louis, Charl wil vir Meesters vergoed
2012-04-12 08:58
Johannesburg – Suid-Afrika se twee voorste gholfspelers, Charl Schwartzel en Louis Oosthuizen, sal die teleurstellings van die afgelope Amerikaanse Meesterstoernooi van vandag af saam-saam op die agtergrond wil skuif wanneer hulle in die eerste twee rondes van die Maleisiese Ope saam speel.
Oosthuizen, die Britse Ope-kampioen van 2010, het Sondag binne millimeters daarvan gekom om ’n groen Meestersbaadjie van Schwartzel, verlede jaar se kampioen, te ontvang, maar hy is van dié voorreg ontneem toe die Amerikaner Bubba Watson die titel met ’n wonderhou op die tweede uitspeelputjie syne gemaak het.
Schwartzel het Dinsdag gesê hy en Oosthuizen het nie op hul vlug van Georgia na Kuala Lumpur oor die teleurstellende wending by Augusta gepraat nie.
Hulle sal die onderwerp waarskynlik ook nie aanroer wanneer hulle die skoonvelde van die Kuala Lumpur-gholfklub Donderdag en Vrydag saam bewandel nie.
Ná ’n vriendskap van ’n dekade en ’n half het dié duo hope meer om oor te gesels as ’n hartverskeurende dag in Augusta.
Schwartzel het gesê hy was onbeskaamd aan Oosthuizen se kant tydens Sondag se aksie.
“Dit sou ’n sprokiesverhaal gewees het om die baadjie om Louis se skouers te hang, maar dit was nie só bestem nie.
“Ek dink hy het die beste gholf van almal gespeel en het verdien om te wen, maar dit het nie so uitgewerk nie.
“Soms is gholf nie regverdig nie,” het hy volgens die Europese reeks se webwerf gesê.
Oosthuizen het gesê hy is steeds teleurgesteld, maar hy weier om in sak en as te sit oor sy tweede plek.
“Dit beteken eenvoudig dat ek die baadjie nou selfs méér wil hê,” het hy gesê.
“Maar eers hoop ek om my goeie peil van die laaste weke voort te sit.
“Ek dink enigeen wat bestendig goed speel wil in so veel moontlik toernooie speel en hopelik ’n paar keer in die wenkampie draai.”
Schwartzel en Oosthuizen het Donderdagoggend om 02:00 (SA tyd) saam met Thailand se Thongchai Jaidee afgeslaan.
Die Suid-Afrikaners Jbé Kruger, Branden Grace en Hennie Otto – wat reeds dié seisoen in die Europese reeks geseëvier het – George Coetzee, Richard Sterne, Peter Karmis, Tjaart van der Walt en Keith Horne is ook in Maleisië in aksie.
Vir die jongste sportnuus volg Nuus24Sport op Twitter.
– Sport
