Li Na wou soos Federer maak

2012-08-20 08:15

Cincinnati – China se top-vrouespeler Li Na het haar eerste titel gewen sedert sy 15 maande gelede as die wenner van die Franse Ope gekroon is.

Li het Angelique Kerber Sondag met 1-6, 6-3, 6-1 geklop om die Cincinnati Ope in Amerika te wen.

Die 30-jarige is in die eerste stel verwoes, maar het haar afslane verbeter om die laaste twee stelle te domineer.

Dit is haar eerste toernooi onder die afrigterskap van Carlos Rodriquez, wat verlede week sy nuwe pos ingeneem het.

Li het gesê Roger Federer se oorwinning vroeër in die mans se eindstryd het haar inspireer. Federer het Novak Djokovic in skoon stelle met 6-0, 7-6 (9/7) verslaan.

"Ek wou dieselfde doen. Ek wou die titel wen want vanjaar was ek drie keer in 'n eindstryd, maar kon nie een wen nie," het sy gesê.

Li het 100 minute benodig om van Kerber ontslae te raak en die oorwinning beteken ook dat sy haar negende plek op die ranglys behou.

Vir die jongste sportnuus volg Nuus24Sport op Twitter.

– Sport24