Legendariese fietsryer raakgery
2010-03-18 06:57
Jana Breytenbach, Die Burger
Kaapstad-Willie Engelbrecht, een van Suid-Afrika se voorste fietsryers van weleer, is Woensdag op die Contermanskloof-fietsroete deur ’n plaastrok raakgery.
Engelbrecht (47) is ’n vyfmalige wenner van die Cape Argus Pick n Pay-fietstoer en het onder meer sowat 20 Suid-Afrikaanse fietsry-titels gewen.
Hy en ’n vriend het omstreeks 09:15 op dié fietsroete naby die Vissershok- en Contermanskloof-pad gery toe ’n plaastrok hom van voor getref het. Hy het onder die vragmotor beland.
Hy het twee gebreekte ribbes en ’n sny aan die been opgedoen – dieselfde been wat twee jaar gelede in ’n ernstige ongeluk beseer is. Dokters het hom destyds net ’n 30%-kans gegee om dié been te behou.
“Die trok het aan die verkeerde kant van die pad gery en in my vasgery terwyl die son in sy oë geskyn het.”
Engelbrecht het verder gesê die bestuurder het dadelik gestop en aangebied om hom hospitaal toe te neem, maar Engelbrecht het op sy fiets geklim en huis toe gery.
“Ek kon dit net halfpad ry en toe moes iemand my oplaai en my dokter toe neem.”
Hy is ’n lid van die Tygerberg-fietsryklub, by wie hy ’n maandelikse permit koop om toegang tot sommige fietsroetes op plase te mag gebruik.
Adrian Windsor, klubsekretaris van die Tygerberg-fietsryklub, het gesê die roete word nie deur die klub onderhou nie.
Volgens Windsor het die klub ’n verstandhouding met die plaasbestuurder, Robert Stark, dat lede van die klub op die Contermanskloof-plaas mag ry.
Stark het by navraag aan Die Burger gesê hy is glad nie bewus van die voorval nie en dat hulle nie met trokke op die plaas werk nie.
“Daar is twee maatskappye wat grond huur op ons plaas wat wel met trokke werk, en dit is moontlik dat die bestuurder vir een van die twee maatskappye werk.”
Engelbrecht het nie die voorval by die polisie aangemeld nie.
- Die Burger