Lance kla oor 'doodsvonnis'
2013-01-19 07:35
Video - Lance Armstrong-onderhoud
Kyk hier hoe die fietsryer Lance Armstrong erken dat hy opkikkers in al sewe sy Tour de France-oorwinnings gebruik het.
KYK
Washington – Lance Armstrong het in die tweede deel van sy onderhoud met Oprah Winfrey die regverdigheid van sy lewenslange uitsluiting uit sport bevraagteken, en dit 'n "doodsvonnis" genoem.
"Ek verdien om gestraf te word," het hy Vrydag gesê. "Ek's nie seker ek verdien 'n doodsvonnis nie," het hy bygevoeg, en sy swaar straf vergelyk met die straf van ses maande se uitsluiting wat die fietsryers opgelê is wat saam met hom opkikkers gebruik en toe teen hom getuig het.
Armstrong, 41, het met 'n ywerige "hel, ja" geantwoord toe hy gevra is of hy weer aan sportbyeenkomste wil deelneem. "Maar dis nie hoekom ek doen wat ek doen nie."
Hy het gesê hy verwag nie dat sy straf versag sal word nie.
Sy kommentaar volg ná hy erken het dat hy met al sewe sy Tour de France-oorwinnings opkikkers gebruik het. Hy het altyd ten sterkste ontken dat hy opkikkers gebruik het.
"Die gebruik van verbode middels was soos om lug in ons bande of water in die bottel te hê. Dit was deel van ons werk," het hy gesê.
– Volg Nuus24 op Twitter.
- Sapa-DPA
