Lance Armstrong trap in Indië
2011-01-10 15:30
Moembai - Die voormalige Tour de France-kampioen Lance Armstrong gaan saam met sy RadioShack-spanmaats die speke in vanjaar se Tour de Mumbai laat sing.
Die fietstoer strek oor twee dae en skop af op 11 Februarie in Nashik, sowat 160km noordoos van Moembai.
Deelnemers sal in die eerste skof 158km aflê terwyl die tweede en laaste skof 117km later in Moembai eindig.
RadioShack asook Italië se Liquigas-span het hul deelname in 'n gesamentlike verklaring bevestig.
Verlede maand het RadioShack aangekondig dat die Australiër, Robbie McEwen, 'n driemalige wenner van die Tour de France se groentrui, en Robbie Hunter, die eerste Suid-Afrikaner wat 'n skof in die Tour kon wen, hulle by die Amerikaanse span aangesluit het.
"Ons glo Indië het reuse potensiaal om fietsry op 'n professionele vlak te verteenwoordig," het die direkteur van die Internasionale Fietsryvereniging (UCI), Philippe Chevallier, gesê.
Die Argentyn Juan Jose Haedo, wat vir Saxo Bank jaag, het verlede jaar se Tour de Mumbai gewen.
Vir die jongste sportnuus volg Nuus24Sport op Twitter.
- Sport24