Lance Armstrong te sien in Argus
2010-02-04 13:10
Kaapstad – Die sewemalige Tour de France-wenner, Lance Armstrong het op Twitter aangekondig dat hy vanjaar aan die Cape Argus Pick ’n Pay-fietstoer gaan deelneem.
Armstrong, wat einde verlede jaar sy eie span, RadioShack gevorm het, het Woensdag die volgende op Twitter geskryf: “Hallo Suid-Afrika! Ek sien baie uit om julle in Maart te besoek. Bring julle man @darylimpey saam. Ons gaan aan die Argus deelneem. Hoor wonderlike goed.”
Die Suid-Afrikaner, Daryl Impey is deel van die RadioShack-span en hy het onlangs saam met Armstrong aan die Tour Down Under in Adelaide deelgeneem.
Die Cape Argus-fietstoer vind Sondag op 14 Maart plaas.
Armstrong sal vanaf 9 Maart tot 11 Maart in Suid-Afrika wees om ‘n welsynorganisasie, die JAG Vereniging (waar minderbevoorregte kinders aangemoedig word om aan sport deel te neem) te help geld insamel.
Hy sal ook ‘n reeks oggendetes, aandetes en ‘n 100km fietstoer om Kaapstad aanbied waarvoor fietsry-entoesiaste kan betaal om deel van te wees.
- Sport24