Lance Armstrong smaak glo Kaapstad
2010-03-09 15:50
Kaapstad - Dit wil voorkom asof Lance Armstrong se oponthoud by Kaapstad se internasionale lughawe iets van die verlede is en dat hy met sy eerste fietsrit in Suid-Afrika sy hart op die Moederstad verloor het.
Armstrong is tans op 'n blitsbesoek in Suid-Afrika om fondse vir die JAG-stigting, 'n organisasie wat hom vir die ontwikkeling van die Suid-Afrikaanse jeug deur middel van sport en opvoeding beywer, te help insamel.
Hy gaan ook praat oor die noodsaaklikheid van 'n gesonde leefstyl en die krag van sport om jongmense positief te beïnvloed.
Dié sewemalige Tour de France-kampioen het Dinsdagoggend op sy fiets gespring om ‘n rit deur Kaapstad te vat.
Op sy Twitter-blad het hy die volgende inskrywing gemaak: "So pas vir drie ure fiets gery. Ek het al soveel kere gehoor dat Kaapstad beeldskoon is. Dit was geen leuen nie. Wat ‘n plek!"
Armstrong het vir ‘n foto by Chapmans Piek saam met sy RadioShack-spanmaat, die Suid-Afrikaner Daryl Impey poseer.
Dinsdag sal 450 gaste die aand saam met Armstrong en bekende Suid-Afrikaanse sportsterre by die Kaapstad-stadion in Groenpunt deurbring.
Die “Ry saam met Lance”-geleentheid sal op 10 Maart aangebied word waar besigheids- en sportpersoonlikhede op ‘n sosiale 100km-fietsrit saam met dié legende sal ry.
Op 11 Maart sal ongeveer 850 mense 'n ontbytfunksie by die Constantia Uitsig wynlandgoed bywoon.
- Sport24