Laaste Tour de France vir Lance
2010-06-29 13:28
Los Angeles – Die Amerikaanse fietsryer Lance Armstrong het Maandag op sy Twitter-profiel aangekondig dat vanjaar se Tour de France sy laaste sal wees.
“Ja, dit sal vanjaar die laaste keer wees wat ek aan die Tour deelneem. Ek sien uit na drie opwindende weke wat voorlê,” het Armstrong Maandag getweet.
Armstrong sal Saterdag vir oulaas saam met sy RadioShack-spanmaats in België wegspring in 'n poging om die geel trui vir die agste keer oor sy kop te trek.
Dié aankondiging volg slegs ‘n maand nadat Armstrong hom weer midde ‘n opkikker-skandaal bevind het. Sy oud-spanmaat, Floyd Landis, beweer dié Amerikaner het saam met hom verbode middels gebruik toe hulle nog saam vir US Postal gejaag het.
Armstrong het vanjaar tweede in die Toer van Switserland en derde in die Toer van Luxemburg geëindig.
Andreas Kloden van Duitsland en die Amerikaner Levi Leipheimer is twee van die ervare fietsryers wat saam met die sewemalige kampioen in die RadioShack-span sal jaag.
Bly op hoogte van al die jongste sportnuus deur Nuus24Sport op Twitter te volg.
- Sport24